🍇 Vokatra manova fiainana

Mahafantatra olona feno finoana ve ianao eo amin’ny manodidina anao ?

Isaky ny mieritreritra olona feno finoana aho, dia mahatadidy ilay vehivavy antitra iray ao amin’ny sarimihetsika mitondra ny lohateny hoe “War Room”. Vehivavy iray manana finoana mirehitra sy miampita tokoa izy. Tena nisy fiantraikany izany satria teo aminy no nahafahan’ny Tompo nitondra fiovana tamin’ny vehivavy iray izay nandalo olana tao amin’ny tokantranony. Ny fijoroana vavolombelona sy toroheviny, tamin’ny maha-vehivavy feno finoana azy, dia nanova ny fiainany sy ny tokantranony ho mandrakizay !

Ny finoana dia toetra iray hafa koa amin’ireo izay feno Fanahy Masina sy feno ny fitiavan’Andriamanitra. Raha ny marina, hoy ny Baiboly hoe: “Ary ny oloko marina dia ho velon'ny finoana” (Hebreo 10:38). Ny fitiavan’Andriamanitra no mameno antsika amin’ilay finoana ilaintsika mba handresena na inona na inona toe-javatra iainantsika. Ary tsy izany ihany: ampiasain’Andriamanitra koa ny finoanao mba hikasika olona hafa sy hanova ny fiainany ho mandrakizay. Ny finoana dia vokatra sarobidy sy manova fiainana !

Tianao ve ny hanana finoana bebe kokoa ? Avelao aho hivavaka ho anao:“Tompo ô, misaotra Anao aho noho ny amin’ny namako, sy noho ny faniriany hitombo ao amin’ny finoana. Mangataka aminao aho mba hameno azy amin’ny fitiavanao toy ny tsy mbola nisy hatrizay, ary mba hahatsapany fa tena eo akaikiny Ianao amin’izao fotoana izao. Aoka ny Fisianao sy ny fitiavanao hampitombo ny fahatokiany, mba hanana fahatokisana tanteraka amin’ny finoana izy, ary hanomboka hamoa voa izany finoana izany amin’ny lafiny rehetra eo amin’ny fiainany. Misaotra Anao aho noho ny amin’ny fiainany sy ny amin’izay efa ataonao ! Amin’ny anaran’i Jesosy. Amena !”

Mitondra anao ao am-poko sy am-bavaka aho !