Vokatra iray manova

Mahafantatra olona vontom-pinoana ve ianao eo amin’ny manodidina anao ?
Isaky ny miezaka mieritreritra olona iray feno finoana aho dia mahatsiaro mpilalao iray amin’ilay horonantsary « War Room ». Izy io dia vavy antitra iray izay manana finoana mirehitra sy mora mifindra. Hany ka tamin’ny alalany dia afaka nikasika vehivavy nandalo olana ara-panambadiana ny Tompo. Ny fijoroana vavolombelona sy ny torohevitr’io ramatoa io no nanova mandrakizay ny fiainany sy ny fanambadiany !
Ny finoana dia toetra iray mampiavaka ireo izay feno ny Fanahy Masina sy ny Fitiavan’Andriamanitra. Raha ny marina, ny Baiboly dia milaza fa “ny olona marina dia ho velon’ny finoana” (Hebreo 10:38). Ny Fitiavan’Andriamanitra dia mameno antsika finoana izay ilaintsika handresena ny toe-javatra rehetra. Ary tsy izany ihany : mampiasa ny finoanao Andriamanitra hikasihana olona hafa sy hanovana ny fiainany mandrakizay. Vokatra sarobidy sy manova ny finoana !
Te hanana finoana misimisy kokoa ve ianao ? Mamelà ahy hivavaka ho anao : “Tompo o, misaotra Anao aho noho ny amin’ity namako ity, sy ny amin’ny faniriany hitombo amin’ny finoana. Mangataka Aminao aho mba hanodidina azy tsy mbola misy toy izany ny Fitiavanao, ary mba ho tsapany fa mitoetra eo akaikiny ianao izao ankehitriny izao. Enga anie ny Fanatrehanao sy ny Fitiavanao hampitombo azy amin’ny fahatokiana ao anatin’ny finoana, ary aoka io finoana io hanomboka hitondra vokatra amin’ny lafim-piainany rehetra. Misaotra Anao aho ny amin’ny fiainany sy izay efa Nataonao ! Amin’ny anaran’I Jesosy ! Amena !
Mitondra anao ato am-poko sy anatin’ny vavako aho !