🥰 Tsy miandry afa-tsy ianao Izy!
Ho amin'ity andian-teny manaraka ity, jereo ny fomba namaranan’Andriamanitra ny hafany ho an'i Josoa. Hoy Izy hoe : “Tsy efa nandidy anao va Aho? Koa mahereza sy matanjaha; aza matahotra na mivadi-po, fa momba anao Jehovah Andriamanitrao amin'izay rehetra alehanao.” (Josoa 1:9)
Intelo izay no nampaherezan’Andriamanitra an'i Josoa mba hahery sy hatanjaka. Fa tamin'ity indray mitoraka ity, naneho izany tamin'ny endrika baiko Izy. Hevero hoe manao ahoana ny lanjan’izany teny izany ho Azy Tompo matoa averiny imbetsaka!
Noho izany dia nampihatra izany i Josoa, nandritra ny androm-piainany manontolo, nitondra ny Zanak'Israely tamin-kery lehibe, mandrapaha-tanteraky ny fampanantenan’Andriamanitra ka nahatongavan’izy ireo tao tany Kanana. Isan'andro, namporisika azy mba handroso hatrany ireo tenin'Andriamanitra, ka tsy nitsahatra nivoatra izy, na dia tao anaty fotoan-tsarotra aza.
Talohan'ny fotoana nialany aina, namory ny vahoaka izy ka nilaza tamin'izy ireo tamin-kerimpo ny vahaolana goavana manao hoe: “Nefa raha tsy sitrakareo ny hanompo an'i Jehovah, dia fidionareo anio ary izay hotompoinareo. [...] fa raha izaho sy ny ankohonako kosa, dia hanompo an'i Jehovah izahay.” (Josoa 24:15) Nohazoniny hatramin'ny farany ny toe-tsaina tia manompo sy be herimpo!
Eny, ny ezaka sy ny herimpo dia tsy azo atao tsinontsinona raha te hisitraka ireo Fampanantenany ho an'ny fiainantsika isika, araka ny hitantsika tamin'ireo andro lasa ireo.
Ry namako, mahareta amin'ny fanompoana an'Andriamanitra amin-kerimpo! Mety hanakivy ireo fotoan-tsarotra lalovana, fa aza avela hampilavo lefona izany! Raha ny marina dia mihamafy kokoa ny ady rehefa manakaiky ny fandresena isika, ka aza manaiky ho fitahina ianao. Efa hisitraka ireo fampanantenana nataon'Andriamanitra ianao atsy ho atsy, ka mahareta hatrany amin'ny ezaka izay atao, diavo am-pinoana ny lala-marina ary mazotoa manome ny tsara indrindra hatrany!
Miandry anao ny tany Kanana.
