Tsy maintsy mandalo amin’izany ianao… fa tsy irery akory
Endrey, tena faniriako tokoa raha mba afaka mifanatrika matetika aminao aho, mba hilaza mivantana aminao ireo teny avy ao am-pon’Andriamanitra, sady mijery anao mahitsy amin’ny masonao…😍
Alaivo sary an-tsaina kely hoe izany no mitranga… Satria izay hozaraina aminao anio dia tena lasa sarobidy be tamiko ihany koa.
Miresaka momba ny “mandalo rano lalina” ny Baiboly ao amin’ny Isaia 43. Ary izao no tena voalaza :
“Raha mita ny rano ianao, dia homba anao Aho; Ary raha mita ny ony ianao, dia tsy hanafotra anao izy” (Isaia 43:2) 🌊🤲🏻
Mety mandalo vanim-potoana iray ianao izao, izay toy ny fitsapana tsy mety tapitra, ka ao anatiny no anontanianao tena hoe : “Ahoana no hahafahako mivoaka amin’ity?”
Eny, indraindray ny fiainana dia toy ny fitsapana tsy misy farany – toy ny renirano mikoriana mafy izay manambana hitondra anao.
Fa tsarovy ilay tantara ao amin’ny Eksodosy 14:1-31 :
Nijoro teo anoloan’ny Ranomasina Mena ny vahoakan’Israely. Tao aoriany ny tafik’i Farao.
Teo anoloany, rano hatrany amin’izay hitan’ny maso. TSY NISY LALANA HIALANA – nefa nosokafan’Andriamanitra roa ny ranomasina ka nampandaloviny teo afovoany izy ireo. Tsy hoe nanodidina. Ny lalana tokana dia ny namakivaky an’ilay zavatra izay toa tsy ho vita mihitsy ! 😲🤯
Angamba ianao maniry mba hanesorin’Andriamanitra fotsiny ny tahotrao na hanova ny toe-javatra misy anao.
Indraindray ataony izany. Fa matetika kosa, tsy izany no ataony.
Ary amin’izay fotoana izay, Izy no miara-mandeha aminao eny an-dalana ! 💙
Nahoana ? Satria eo indrindra ianao no…
👉 …mahita fa mahery lavitra Izy noho ilay onja manambana anao !
“Mihoatra noho ny rano sady be no mahery, Eny, mihoatra noho ny onjan-dranomasina lehibe, Ny voninahitr'i Jehovah any amin'ny avo!” (Salamo 93:4)
Nahoana? Satria indrindra eo ianao no…
👉 …mahatsapa fa mafy orina kokoa ny fanohanany noho ny tany mirodana eo ambanin’ny tongotrao !
“ary nampitoetra ny tongotro teo ambony vatolampy Izy ka nampijoro ahy.” (Salamo 40:2b)
Aza adino fa Ilay mahavita ny zavatra rehetra dia EO ANILANAO FOANA !
Anio mihitsy – ao anatin’io zavatra iainanao io.
Fahagagana ianao !
