Tsara tarehy loatra ianao !
Manana fotoana kely ve ianao ? Raiso haingana ary ny findainao ary makà sary ny tenanao. Izao mihitsy, tsy namboarina. Amin’ny maha ianao anao izao.
Na, jereo haingana ny tenanao eo amin'ny fitaratra… Inona no hitanao ? Inona no eritreritra tonga tampoka ao an-tsainao ?
Ny tiako holazaina aminao dia ny tena votoatin'ny fiainanao, satria raha tena manomboka mino izany ianao dia hiova mandrakizay:
Izay hitanao eo amin'ny fitaratra no hitan'Andriamanitra…ary tiany…tsy manam-petra !
Ary ankehitriny, andeha isika handroso lalina kokoa... na tsara kokoa aza, andeha isika hiverina amin'ireo pejy voalohany ao amin'ny Baiboly, izay amakiantsika hoe:
"Ary Andriamanitra nanao ny bibi-dia, samy araka ny karazany avy, sy ny biby fiompy, samy araka ny karazany avy,.." (Genesisy 1:25)
Voamarikao ve fa voalaza eto hoe: "Nanao azy araka ny karazany avy Izy"? Raha manohy mamaky izay lazain'Andriamanitra momba ny famoronana isika dia mamaky hoe: "Ary Andriamanitra nahary ny olona tahaka ny endriny; tahaka ny endrik'Andriamanitra no namoronany azy; lahy sy vavy no namoronany azy." (Genesisy 1:27)
Tsy milaza izany hoe: "Nahary ny olona araka ny karazany avy Izy..."! Fa kosa: "Nahary ny olona tahaka ny endriny Izy!" Wow ! Mihoatra noho ny fiheverantsika izany !
Ny fanazavana voalohany hitako tao amin'ny rakibolana momba ny teny hoe "endrika" dia: “olona mitovy be amin'ny olon-kafa."
Nisafidy ny hamorona anao Andriamanitra tsy araka ny "karazanao", fa "araka ny Endriny", dia ny Endriny izany ! Ny endriny masina !
Aza misalasala mijery ny tenanao eo amin'ny fitaratra indray: "Ianao no taratry ny endrik'Andriamanitra, ianao no taratry ny Endriny!"
Tsy fantatro ny aminao, fa mbola talanjona amin'ny fitiavan'Andriamanitra ahy aho hatramin'ny niandohan'ny namoronany ahy !
Andeha isika hanolotra ny fisaorantsika rehetra ho an'Andriamanitra, izay tsy namorona anao araka ny endrika hafa, fa araka ny endriny, ary tiany ho tahaka anao mihitsy ianao !
"Hidera Anao aho; fa mahatahotra sy mahatalanjona ny nanaovana ahy; Mahagaga ny asanao; Ary fantatry ny fanahiko marimarina izany." (Salamo 139:14).
Misaotra anao, Tompo ô, noho ny namoronanao ahy araka ny endrikao ! Ampio aho tsy hisalasala intsony fa ilainao amin’ny maha izaho ahy aho ! Amen!
Fahagagana ianao!
