Torohevitra kely ho anao

"Ny Fiangonana?... Tsy liana amin'izany aho!"

Efa nanandrana niresaka tamin’olona momba ny finoanao ve ianao? Azoko antoka fa efa imbetsaka ianao no nandre izany valinteny izany. Dia ahoana no nandrasainao izany?

Ny tena ratsy dia ilay te hanao fiarovan-tena, na momba ny tenanao, na ny finoanao, eny na momba ny Fiangonana mihitsy aza.

Inona anefa no afaka manampy antsika amin’ny toe-javatra toy izany?

Ohatra, amin'ny fizarana ny traikefanao manokana! Na zavatra toy izao :

"Fantatrao ve, nahatsapa toy izany koa aho. Fa mamelà ahy hitantara aminao izay nataon'Andriamanitra tamiko rehefa nitodika tany Aminy aho ka nitaraina taminy. Nanafaka ahy Izy! Nampianatra ahy hamela heloka Izy! Nampianatra ahy hitia Izy!”

Tsy heverinao ve fa misy fiantraikany lehibe lavitra noho ny fifanakalozan-kevitra ara-teolojika izany fijoroana vavolombelona izany?

Maro ny olona manana fisalasalana sy fanontaniana momba ny Fiangonana, ary indraindray dia tena mitombona tanteraka izany! Saingy zavatra iray no azo antoka : Tsy ho afaka handà velively ny fijoroanao ho vavolombelona momba an’i Jesosy izy ireo.

Ary rehefa hitany ny fomba nanovan’i Jesosy anao tamin’ny alalan’ny Fitiavany, dia azo antoka fa maniry hanokatra ny fony koa izy ireo indray andro any mba hizara izany fitiavana izany amin’ny hafa - anisan’izany ny ao anatin’ny Fiangonana.

Mandany fotoana be isika amin'ny fiezahana hametraka ny hevitsika momba ny finoana na ny Fiangonana ka manidy varavarana alohan'ny hanomezantsika fahafahana ny olona hahita hoe iza marina i Jesosy!

Tsy hampiova ny fo ny hevitrao, fa ny fijoroanao ho vavolombelona dia hikasika avy hatrany ny fo! 🩵

Hoy Jesosy tamintsika: “Mandehana any amin’izao tontolo izao, ka mitoria ny filazantsara amin’ny olona rehetra”. (Marka 16:15).

Fantatrao ve fa ny teny hoe “Filazantsara” dia avy amin’ny teny grika hoe “euangelion”, izay midika hoe “Vaovao Tsara”? Tena vaovao tsara tokoa izany!

Koa ankehitriny, aoka isika hitandrina ny amin’ny fomba fizarana izany.

Aoka tsy hiditra anaty ady hevitra isika fa zarao am-pitiavana izany Vaovao Mahafaly izany!