Taona nahomby ve ity taona ity?

Rehefa manao jery todika ny taona 2025 ianao, taona nahomby ve ny fahitanao azy? Nanana taona miavaka ve ianao? Tena ho faly ho anao aho raha izany. Nefa angamba tsy nandeha araka ny nantenainao ny zava-drehetra?

Fantatrao ve fa, na nahomby na tsia ny taonanao, dia zavatra iray ihany no tena zava-dehibe? Ny fanekena sy ny fahatsiarovana fa Andriamanitra dia mahita ANAO. Ary hitany koa ny toetry ny fonao, na sendra fahombiazana ianao na tojo fahasahiranana lehibe…

Nahomby ve ny taonanao noho ny asa tsara nataonao, sa noho ny fahombiazanao izay lasa loha laharana?

Vao haingana aho no namaky andinin-teny iray tao amin’ny Baiboly izay nanohina ahy lalina:

“Mahasoa inona ny sarin-javatra voasokitra, No misokitra azy ny mpanao azy? Na ny sarin-javatra an-idina sy ny mpampianatra lainga, No matoky azy izay namorona azy Tamin'ny nanaovany sampy moana? Lozan'izay manao amin'ny hazo hoe: Mifohaza! Ary amin'ny vato moana hoe: Mitsangàna! Hampianatra va ireo ? He! voapetaka takela-bolamena sy volafotsy ihany izy, Nefa tsy misy fanahy akory ao anatiny. Jehovah dia ao amin'ny tempoliny masina; Mangina eo anatrehany, ry tany rehetra!" (jereo Habakoka 2:18-20).

Matetika isika no manadino fa ny zavatra izay tena mampirehareha antsika, izany hoe ny zavatra “vitantsika” na “noforonintsika”, dia tsy manan-danja raha toa ka manadino an’ilay Mpamorona izay nanome antsika ny fahafahana hanao izany isika.

Sarobidy kokoa eo imasonao noho izay noforoninao ve Ilay nahary anao?

Toy ny ahafahanao misaintsaina ny zava-bitanao, dia afaka mahita anao koa ilay nahary anao. Fa Izy no “... Andriamanitra Izay mahita” (jereo Genesisy 16:13).

Ary inona no ho hitany? Olona midera Azy noho ny fahombiazana azony, sa olona mankalaza ny tenany noho ny zava-bitany?

Amin’izao ankatoky ny faran’ity taona ity izao dia manentana anao aho mba hanokana fotoana hisaintsainana sy hisaorana an’Ilay nitahy anao be dia be!