Satria isika rehetra dia misalasala…
Tiako ny hampahery anao mandritra ny andro vitsivitsy mba hahitanao ilay faniriana lalina ao am-ponao sy hanatanteraka izany. Hojerentsika akaiky ny tantaran’i Gideona ao amin’ny bokin’ny Mpitsara mba hanaovana izany. Izy koa dia nisalasala matetika momba ny drafitr’Andriamanitra ho an’ny fiainany. Tena maniry aho mba hanampy anao hahita ilay fahagagana miafina ao ambadik’ilay faniriana ao am-ponao ireto andro ireto...
"raha momba anay Jehovah, nahoana no ozoin'izao rehetra izao izahay?" (Mpitsara 6.13)
Andeha isika hilaza ny marina, moa ve tsy misy fotoana mampisalasala anao? Ahoana no ahafahan’Andriamanitra mamela fijaliana be dia be eto amin’izao tontolo izao, ary angamba eny amin’ny manodidina anao mihitsy aza?
Indraindray, adinontsika fa tsy voalaza mihitsy hoe: "Ho mora ny zava-drehetra", fa kosa hoe : "Atỳ amin'izao tontolo izao no ahitanareo fahoriana; nefa matokia; Izaho efa naharesy izao tontolo izao." (Jaona 16.33).
Raha toa ka mandeha araka ny tokony ho izy eo imason’Andriamanitra ny fiainanao, mety misy ve zavatra manakana ny nofinao? Ny olanao, ny fisalasalanao, sa angamba ianao mihitsy? Efa navelanao hiditra tao am-ponao ve ny fahakiviana?
Rehefa nomen’Andriamanitra ny iraka hamonjy ny Isiraely, i Gideona dia tonga saina izy fa tsy ho vitany izany. Nefa Andriamanitra kosa nahita izay napetrany tao anatiny mba hahafahany manatanteraka izany iraka izany. "Indrisy, Tompo ô, hataoko ahoana no famonjy ny Isiraely? He! ny mpianakaviko no malahelo indrindra eo amin'ny Manase, ary izaho no kely indrindra amin'ny ankohonan'ny raiko." (Mpitsara 6.15)
Fantatrao ve izany karazana eritreritra izany? Hitanao ny nofinao dia hoy ianao hoe: "Mbola tanora loatra aho, na koa efa antitra loatra! Tsy manana vola hanaovana izany aho. Tsy ampy ny olona manohana ahy..."
Eo anoloan’ity safidy ity ianao: na hijanona ho voafatotry ny fisalasalana sy ny fahatsapana fa tsy vitanao izany, na handray fanapahan-kevitra hiomana amin’ny zavatra vaovao miandry anao (ireo nofinao!).
Ny valin-teny nomen’Andriamanitra an’i Gideona dia omeny ANAO koa: "Homba anao tokoa Aho" (Mpitsara 6.16)
Izaho koa dia nanana nofy madinika maro teo amin’ny fiainako, ary ny tsirairay tamin’izy ireny dia nila natao tam-pitokiana vao hita ny vokany.
Toy izany no nitranga rehefa nianatra tao amin’ny sekolin’ny fiderana tany Aostralia aho (ary tsy nanana vola mihitsy tamin’izany fotoana izany!), ary toy izany koa ankehitriny isaky ny mandrakitra hira vaovao aho. Afaka miroso aho satria matoky an’Andriamanitra, ary fantatro fa Izy no hanome izay ilaina ho an’ilay nofy napetrany tao am-poko! Averiny amiko hatrany hoe: "Homba anao Aho". Tanterahiny ny teniny... ary "fa ny fahalemeko no fahatanjahako." (2 Korintiana 12.10)
Amin’ny lafiny inona amin’ny fiainanao no tokony hialanao amin’ny fisalasalana anio, mba hahafahanao miroso?
Fahagagana ianao!
