😅 Ny fahoriana atrehinao dia misy tanjona avy amin’Andriamanitra !

Manao ahoana ianao izao? Mahatsapa mahery kokoa ve ianao hiatrika ireo fahoriana mety hanoloana anao?Omaly isika nijery fa tian’Andriamanitra ho lasa fanehoana ny voninahiny ireo fahoriana atrehinao,  izany hoe, ho fijoroana vavolombelona amin’ny Fahasoavany sy ny Heriny eo amin’ny fiainanao.

Handeha isika hanohy ny andininy indray: “Ary Andriamanitry ny fahasoavana rehetra, Izay efa niantso anareo ho any amin'ny voninahiny mandrakizay ao amin'i Kristy, rehefa niaritra fahoriana vetivety ianareo…” (1 Petera 5:10)

Tsy nataon’Andriamanitra ho tonga teto an-tany ianao ka tsy hananany planina maty paika tao an-tsainy. Tiany ianao ary nanomana anjara voatendry feno voninahitra ho anao Izy izay ezahin'ny fahavalo ravaina foana.

Saingy, mba hahatongavana amin’izany drafitr’Andriamanitra izany, dia mila mitombo isika. Ary mba hitomboana, dia tsy maintsy mandalo fitsapana sy sedra izay mampahery ny finoana sy ny toetrantsika isika. Izany no mampitombo kokoa ny fifikirantsika amin’Andriamanitra.

Diniho kely anie: tsy ho afaka niatrika sy nandresy an’i Goliata mihitsy i Davida, raha tsy efa niady sy nandresy ny liona sy ny bera izay nikasa hanafika ny ondrin'ny rainy, fony izy mbola mpiandry ondry. Ireny fitsapana ireny no nanomana azy hiatrika ny antso lehibe : ny ho mpanjakan’i Israely sy razamben’ny Mesia.

Izany no antony mahatonga ny fitsapana ho tena ilaina : manampy antsika hitombo, ary manomana antsika amin’ny anjara voatendry nomanin’Andriamanitra ho antsika. Ary koa, hoy i Jakoba : “Ry rahalahiko, ataovy ho fifaliana avokoa, raha iharan'ny fakam-panahy samy hafa ianareo” (Jakoba 1:2)

Hitanao ve ny fomba nilazany azy ? Tokony hifaly lalina isika rehefa mandalo fitsapana, noho ireo vokatra aterany eo amin’ny fiainantsika !

Nandalo fitsapana maro tsy tambo isaina aho nandritra ny fiainako. Ary satria efa fahazarana ho ahy izany, dia lasa haiko avy hatrany rehefa misy toe-javatra sarotra tonga, manelingelina anay mianakavy, ka mitady hanakana, hanemotra, hanimba, ary hanaisotra ny fiadanan’Andriamanitra aminay.

Fa ireo ady ezahin’ny fahavalo hampiasaina hanapotehana anay ireo, dia ampiasain’Andriamanitra hatrany ho fitaovana hampitomboany anay, sy hanatanterahany ny planiny feno voninahitra efa voaomany ho anay.

Raha ny marina, tsy toy izao aho, raha tsy noho ireo fandresena sy fianarana tamin’ireo ady an-jatony izay nolalovako teo amin’ny fiainako !

Ry namako, tsy kisendrasendra akory ny fahoriana atrehinao ! Misy voa sarobidy entiny ho eo amin’ny fiainanao rehefa atolotrao an’Andriamanitra izany. Ary aza adino, vetivety ihany izany fijaliana izany, hoy ilay andininy anio io!

Matokia, ary mahereza ao amin’Andriamanitra anio: efa nanomana zavatra mahafinaritra ho anao Izy.Fahagagana ianao !