Misy namako akaiky manana aliaka tsara tarehy izay, "berger" fotsy!
Manana alika tena tsara tarehy ny namako akaiky, alika fotsy!
Nisy fotoana tena nampihomehy ny zava-nitranga rehefa namangy azy ireo aho. Raha mbola nandamina ny latabatra izahay sady efa faly nahita ireo sakafo matsiro maro be, dia nientanentana ilay alika. Angamba izy nieritreritra sady nilela-molotra hoe: "Anisan'ity fianakaviana ity aho! Tokony hahazo sakafo tsara koa aho!"
Dia nihazakazaka naka ny vilia fisakafoanany izy, izay nofenoina sakafo matsiro avy hatrany. Kanjo, raha mbola nameno ny loviany hatramin'ny farany ny tompony, dia tsapan'ilay alika fa ilay vilia kely no nentiny, nefa mbola afaka nahazo sakafo betsaka kokoa izy! Koa dia nihazakazaka haingana izy naka ny vilia lehibe!
Tena nampihomehy ilay zava-nitranga, nefa afaka ampitoviantsika amin'ny fifandraisantsika amin'Andriamanitra!
Impiry ianao no manatona an'Andriamanitra mitondra ny "vilia kelinao", satria mieritreritra hoe: "Raha mba afaka manampy ahy amin'ity olana keliko ity fotsiny Andriamanitra dia ampy ahy izany." Na koa hoe: "Raha mba manome ahy ampahany kely amin'ny fitiavany fotsiny Andriamanitra, dia ho mora kokoa amiko ny hanohy hiaina."Kanefa, tahaka ilay tantara anio, dia tian'Andriamanitra holazaina aminao hoe: "Mbola manana zavatra betsaka lavitra ho anao Aho." Hoy ny Jakoba 4.2: "Mila ianareo, nefa tsy manana ihany"
Anio no fotoana mety handraisanao ilay "vilia lehibe", izay efa voaomana ho anao!
Raha mino mihoatra noho ny hatramin'izay ianao anio, dia handray mihoatra noho ny hatramin'izay!
"Fa Andriamanitro hahatanteraka izay rehetra tokony ho anareo araka ny hareny amin'ny voninahitra no amin'i Kristy Jesosy." (Filipiana 4.19)
Koa inona indray no andrasanao?
"Mangataha, dia homena ianareo; mitadiava, dia hahita ianareo; dondony, dia hovohana ianareo. Fa izay rehetra mangataka no mahazo; ary izay mitady no mahita; ary izay mandondòna no hovohana. Ary iza moa aminareo, raha angatahan'ny zanany mofo, no hanome azy vato? Ary raha angatahany hazandrano, no hanome azy menarana? Koa raha ianareo, na dia ratsy aza, mahalala hanome zava-tsoa ho an'ny zanakareo, tsy mainka va ny Rainareo Izay any an-danitra no hanome zava-tsoa ho an'izay mangataka aminy?" (Ampahany avy amin'ny Matio 7.7-11)
Eny, tahaka ilay alikan'ny namako izay niteny anakampo hoe: "Anisan'ity fianakaviana ity koa aho," dia afaka matoky tanteraka koa ianao anio hoe:
"Anisan'ny fianakavian'Andriamanitra ianao!"
Mangataha, dia homena ianao!
