🤠 Miandry anao ny Far West…

Fantatrao ve ny fitaovam-pitaterana tamin’ny andron’ny Far West ? Fiara kely notarihin’ny soavaly, natao hitondra mpandeha sy ny entany. Nisy efitra anatiny izy ireny, ka afaka nipetraka tsara ny olona nandritra ny dia.

Tany am-piandohana dia nantsoina hoe “voitures de diligence” izy ireny. Avy amin’ny teny latina “diligentia” ilay anarana, izay midika hoe fahazotoana, fahakingana, fahatomombanana… Ary izay mihitsy no entin’ilay fiara ho an’ny mpampiasa azy !

Ny fahazotoana dia anisan’ny toetra tena sarobidy eo amin’ny asa. Mifanohitra amin’ny hakamoana izy, satria ny olona kamo dia tara lava, manao zavatra amin’ny fomba tsirambina, ary tsy mamokatra. Raha amin’izany fomba izany no iainana, dia tsy hisy asa vita tsara mihitsy !

Jereo anie izay lazain’ny Baiboly e : “Mazotoa, fa aza malaina, ary aoka hafana fo amin'ny fanompoana ny Tompo.” (Romana 12:11). Rehefa manompo an’Andriamanitra amin’ny fo manontolo ianao, dia hivelatra ho azy ao anatinao ny fahazotoana. Ho tonga faniriana mafy aminao ny hanao zavatra betsaka ary hanao izany amin’ny fomba tsara indrindra.

Ry namako, mazoto amin’ny asanao sy amin’ny fanompoana an’Andriamanitra ve ianao?

Anio, mangataha amin’ny Tompo mba hanavaozany indray ilay finiavana hanompo Azy sy ilay fanahy vonona hanao tsara izay ataonao rehetra. Ho fitahiana lehibe ho anao izany !

Avelako ianao handinika ity tenin’Andriamanitra mahafinaritra ity : “Mahita olona mailaka amin'ny raharahany va ianao? Eo anatrehan'ny mpanjaka no hitsanganany, Fa tsy hitsangana eo anatrehan'ny olona ambany izy.” (Ohabolana 22:29)Fahagagana ianao !