❌ Mialà amin'ny ratsy !
Hojerentsika anio ny andininy farany amin’ilay andalan-teny fohy nefa mafonja. Manantena aho fa tamin’ny alalan’ireo fisaintsainana ireo dia nohavaozin’Andriamanitra ianao sy novelominy tamin’izay rehetra nomaniny ho anao !
Hoy ny andininy fahafito ao amin’ilay andian-teny : “Fadio ny fanao ratsy rehetra” (1 Tesaloniana 5:22).
Omaly isika dia niresaka momba ny maha-zava-dehibe ny fananana fahaiza-manavaka izay avy amin’Andriamanitra sy izay avy amin’ny haizina. Tadidio fa miha-mivoatra izany rehefa maka fotoana hampiharana azy isika.
Noho izany, dia aoka isika hitandrina mba tsy hanao tsinontsinona ny antsipiriany avy amin’Andriamanitra ! Ny andininy anio dia milaza fa tsy maintsy mitandrina tanteraka izay rehetra avy amin’ny haizina isika : na dia ny antsipiriany madinika indrindra aza.
Tena mahaliana ny matoanteny ampiasaina amin'ity andalana ity : "Fadio". Ny olona iray mifady zavatra amin'ny ankapobeny dia manao izany rehefa te-hanao izany izy, saingy misafidy ny tsy hanantanteraka izany. Toy izany koa, isika dia antsoina hifady izay rehetra tsy araka an’Andriamanitra, na dia toa manintona eo imasontsika aza izany !
Tsy izay miharihary ho ratsy no resahiko eto, satria fantatro fa tsy te hanao an'izany ianao ; fa ny asa izay mety hampisalasala antsika no resahiko eto, dia ireo izay toa tsara nefa tsy araka an'Andriamanitra…
- Hitanao, ilay andian-tantara amin'ny fahitalavitra izay matetika ahitana seho hafahafa,
- Ilay sarimihetsika hafahafa izay misy seho mampatahotra,
- Ireny resaka feno fanesoana sy fanakianana miaraka amin'ny mpiara-miasa sasany ireny.
- Ary ireo maro karazany hafa ihany koa…
Ny tsara indrindra atao amin'ny toe-javatra toy izany dia ny ambaran'ity andalan-teny ity amintsika : miala amin'ny endrika ratsy rehetra… Na kely izany na lehibe : ny “karazany” rehetra, ny “endrika” ratsy rehetra dia tsy maintsy esorina tanteraka amin'ny fiainantsika.
Hanampy antsika hankamamy izay rehetra avy amin’Andriamanitra ao am-pontsika izany !
Ry namako, aza mandray ny loza izay kasain'ny fahavalo hatao aminao ! Manomboka anio dia mivavaka aho mba hahita fandresena vaovao ianao manohitra izay endrika maizina rehetra eo amin'ny fiainanao, amin'ny anaran'i Jesosy.
Ato am-poko manokana ianao,
