Mialà!

“Fa izaho mananatra anareo, ry rahalahy, mba hitandrina ny amin'izay mahatonga ny fisarahana sy ny fahatafintohinana tsy araka ny fampianarana efa nianaranareo; mialà amin'ireny olona ireny” Romana 16:17

Tamin’ny fotoana nandraisako an’i Jesosy ho Tompo sy Mpamonjy ny fiainako dia nisy fanapahan-kevitra tsy maintsy noraisiko izay nananosarotra ahy ny nanantanteraka azy. Nila niala tamin’ireo olona nitarika ahy amin’ny lalan-diso aho. Nijanona teny foana anefa aho na fantako aza fa tsy mety intsony ny fiarahana… mbola niaraka tamin’izy ireo nandeha nivoaka alina, nisotrosotro… ary rehefa nanomboka niala tsikelikely aho dia nisedra fanenjehana be. Iza no efa niaina izany toa ahy? 

Nandroso tamin’ny fampianarana aho ary noho ny fanampian’ny Fanahy Masina dia vitako ny niala sy nitondra am-bavaka azy ireo, ary nanaiky ny tsy fitoviana ka tsy nanavesatra ahy intsony ny teny nandratra taloha.

Fantaro fa tsy mitovy ny sehatra misy ny mpino sy ny tsy mino. Fa rehefa nankató ny Teny aho hoe “mialà” dia niala. Manasa anao aho hamaky ny tohin’io andininy io rehefa manana fotoana kely ianao. Rehefa nananatra ireo i Paoly dia nahita fa olona mpankató izy ireo ka faly sy niely ny lazan’izy ireo noho ny fahendreny : “Fa efa niely any amin'ny olona rehetra ny lazan'ny fanarahanareo (fankatoavana amin’ny dikan-teny fototra). Ary faly aho noho ny aminareo; satria tiako ho hendry amin'izay tsara ianareo, ary tsy hiharo amin'izay ratsy.” (and 19)

Fantaro ny tombam-bidinao. Sanatria tsy hoe hiavona fa ny anjaranao dia ny mitory ny Filazantsara, mitondra am-bavaka fa tsy miharoharo amin’ny ratsy.  Kristy no velona ao anatinao ary mendrika ny haja sy ny voninahitra sahaza Azy Izy. 

Manasa anao aho, handeha hatsahatra ny marimaritra iraisana hita fa mitondra amin’ny ratsy. Hoy ny Romana 12:2 : “Ary aza manaraka ny fanaon'izao tontolo izao; fa miovà amin'ny fanavaozana ny saina, hamantaranareo ny sitrapon'Andriamanitra, dia izay tsara sady ankasitrahana no marina.”

Am-poko mandrakariva ianao.