🧍‍♂️ Matahotra olona ve ianao ?

Vao avy nahita “post” navoakana tovovavy iray izay aho : nitsangana teo ambony sehatra lehibe izy niaraka tamin’ny voninkazo be ary nitsiky tamin’ny fakantsary !Hoy aho hoe : “Oay, fa tsy ilay vehivavy nanatrika ilay seminera nataoko vao aingana ve ito?” Ilay tovovavy tena mijaly amin’ny fahatahoran’olona (phobie sociale) ! Woooow ! Tena nisy zava-mahagaga nitranga raha izany!

Fantatrao ve ilay fanahiana tampoka tonga amintsika rehefa tokony hiteny eo anoloan’ny olona maro isika ? Tena fantatro tsara izany… Ary mety tsy mino izany ianao satria hoe efa zatra miakatra an-tsehatra aho. Fa matetika tsy ny sehatra lehibe no mampatahotra ahy, fa ilay sehatra kely kokoa aza …

Ohatra, vao aingana aho no niresaka tamin’ny mpianatra 30 nandritra ny dimy andro misesy… Na dia tena voatahy tokoa aza aho tamin’ilay fotoana farany, dia nieritreritra toy izao ihany tamin’ity indray mitoraka ity : “Tsy ho aiko ny hampianatra azy ireo. Tsy dia betsaka ny zavatra azoko zaraina. Tsy mpampianatra ‘za-draharaha’ aho. Mety hahasosotra azy ireo aho izao…” sns…

Tamin’ny marainan’ny niaingako hanao ilay asa dia nitady fankaherezana avy amin’Andriamanitra aho, ary izany mihitsy moa no hanasako anao rehefa amin’ny fotoana toy ireny. Nony namaky an’ilay boky fisaintsainako isan’andro izay aho, dia nanaitra ahy ity andininy ity : “fa ny Mpananatra, dia ny Fanahy Masina, Izay hirahin'ny Ray amin'ny anarako. Izy no hampianatra anareo ny zavatra rehetra sy hampahatsiaro anareo ny zavatra rehetra izay nolazaiko taminareo. Fiadanana no avelako ho anareo.” (Jaona 14.26-27a)

Ny Fanahy Masina no tena ilainao raha ny marina !

Koa ankehitriny, mankanesa eo amin’ny seza fiandrianan’Andriamanitra amim-panetren-tena, ary ekeo fa mila ny asany eo amin’ny fiainanao ianao ! Dia diniho fotsiny avy eo ireo asa mahagaga asehony amin’ny alalanao !

Izaho koa dia nanao toy izany… ary ity herinandro ity dia tena mahery lavitra sy voatahy lavitra noho ny tamin’ny farany.

Raha mijoro miaraka amin’ny Fanahy Masina isika, dia miova ho Fiainana ny tahotra ao anatintsika !

Fahagagana ianao !