Mangina eo anatrehan’Andriamanitra ? Tsy manam-potoana 🙄 !

Oh, indraindray aho manontany tena hoe tsy tafahoatra loatra ve aho amin’ny fizarana ny eritreritro rehetra aminao😄, satria sahiko lazaina fa saika tsy misy intsony ny zavatra tsy tantaraiko aminao ! 🤭

Vao tsy ela akory izay, nandany telo andro manontolo aho tany amin’ny fihaonambe niaraka tamin’ny mpitandrina aman-jatony. Rehefa tafody an-trano aho, dia reko ny tenako nilaza hoe :

“Tsy maintsy miverina mitady an’Andriamanitra aho, fa tsapako hoe somary foana ato anatiko !”

Inona ?! Ahoana no nahatonga izany, nefa nandritra ny andro maromaro izahay no niresaka momba ny “fitomboan’ny Fiangonana” sy ny “fomba hitoriana ny Filazantsara” – sady nizara sakafo sy resaka maro tamin’ireo mpitandrina hafa ??? Nifantoka tamin’Andriamanitra ihany anie ny zava-drehetra, sa tsy izany ?

Eny tokoa… ary io indrindra no tena zava-dehibe :

Tsy ampy ny miresaka momba an’Andriamanitra, raha tsy miara-mandeha amin’Andriamanitra ianao !

Feno zavatra loatra ireo andro ireo ka matory tara aho ary mifoha maraina ho amin’ny fivoriana voalohany. Fotoana hanginana ? Tsy manam-potoana… “Ho azon’Andriamanitra ihany izany hoe eto aho noho Izy…”

Kanefa tena mafy ilay hetaheta handany fotoana eo anatrehany, ary saika tsy hay hazavaina mihitsy. Tahaka ny spaonjy maina tanteraka mila rano maika mba hahafahany manohy ny asany, izany no tsapako. 🧽

Indray mandeha indray, izany no nanaporofo tamiko fa marina ny tenin’i Jesosy rehefa hoy Izy :

“...Izay miray amiko, ary Izaho aminy, dia mamoa be izy; fa raha misaraka amiko kosa ianareo, dia tsy mahay manao na inona na inona.” (Jaona 15:5)

Amin-kitsim-po tanteraka : Angamba ianao mahatsapa hoe tsy tafiditra amin’ny fotoana lehibe toy ny fihaonambe na kaonseritra kristianina, noho ny tsy fahampian’ny vola na ny fotoana… Amin’ny finoana sy ny zavatra niainako dia azoko lazaina aminao :

Tsy hisy zavatra tsy ampy aminao, raha ny Fanatrehan’Andriamanitra no ataonao laharam-pahamehana !

Mamporisika anao aho hanapa-kevitra hanome toerana Azy ao anatin’ny fiainanao andavanandro.

Fahagagana ianao !