🐢 Mandehàna mora

Ny fankatoavana dia azo oharina amin’ny fakana fotoana hanomezam-boninahitra an’Andriamanitra fa tsy mbola manohy ny lalanao manokana… Manontany tena angamba ianao hoe inona no tiako hambara. Mahafaly ahy ny hanome ohatra anao hanazavana izany.

Saika hanoratra aho hoe : “Vao haingana kely, raha iny be atao be iny aho…”, kanefa ny marina dia be atao lalandava aho…

Ary rehefa tsy manam-potoana mihitsy aho dia tiako ny manatsahatra ny zavatra rehetra mba hakana rivotra mandehandeha. Mihaino hira fiderana aho ary mankafy azy amin’ny feo avo ho fankalazana ny Andriamanitro eny anivon’ny tontolo ! Mameno fifaliana lalina sy hery vaovao ahy hatrany izany !

Kanefa tamin’ity indray mitoraka ity dia tsy tsikaritro akory aho hoe fatafiditra tao anatina faritra voatokana fihazakazahana iray aho. Ary rehefa nandalo ahy ireo mpihazakazaka feno hatsembohana dia tsapako ho tsinontsinona aho oharina amin’izy ireo !

Tamin’io fotoana io mihitsy no nikasika ahy ny Fitiavan’Andriamanitra ka nampiseho ahy ity fahamarinana manaraka ity : « Mety ho haingam-pandeha tokoa ireo mpihazakazaka ireo, saingy any am-pamaranana dia lanaka izy ireo. Mety misy mpanohana mankahery azy izy eny an-dalana, izay mamporisika azy hanohy ny hazakazany, saingy mihazakazaka ho azy ihany izy ireo. Manan-danja kokoa eo imasoko raha mihazakazaka HO AHY ianao, ka mitoetra amin-kery sy maharitra na dia midika aza izany fa mihazakazaka mora ianao satria maka fotoana miaraka Amiko. Mety ho tsy misy mankahery koa ianao eny an-dalana, saingy manàna antoka fa miandry anao ao ambadiky ny tsipika famaranana Aho ary hamihina mafy anao. »

Izany mihitsy no tiany hambara aminao anio :

Manan-danja kokoa eo imason’Andriamanitra ny fijoroantsika amin’ny finoana sy fandresen-dahatsika noho ny hafainganan’ny hazakazaka ataontsika.

Noho izany, tian’Andriamanitra ianao hamita ny hazakazakao sady mitahiry ao am-ponao ny tenin’I Paoly manao hoe: “Efa niady ny ady tsara aho; nahatanteraka ny fihazakazahako aho; nitahiry ny finoana aho, hatrizao dia tahirizina ho ahy ny satroboninahitry ny fahamarinana.” (2 Timoty 4.7-8a)

Maniry ny hanatsahatra ny zavatra rehetra mandritra ny fotoana fohy ve ianao anio - ka haka fotoana miaraka amin’Andriamanitra ?

Fahagagana ianao!