Manan-talenta ianao!
“Fa izaho kosa, tsy mba manan-talenta!”
Efa imbetsaka aho no nandre izany teny izany. Ary ianao koa angamba dia lasa miombon-kevitra amin’izany!
Izaho manokana dia tena tia an’ilay boky "Une vie motivée par l'essentiel - Pourquoi suis-je sur terre ?” nosoratan’i Rick Warren. Raha mametraka izany fanontaniana izany koa ianao dia tena amporisihako hatrany hamaky izany boky izany.
Saingy anio dia te hitondra fomba fijery hafa ho anao ny tenako:
Ny talenta: indraindray dia tsy ilay zavatra tena hainao atao no zava-dehibe, fa izay safidianao hatao!
Misy namako iray izay tena malala-tanana! Dia izy tsy hoe manana betsaka hatolotra. Mirefy 35 metatra toradroa ny tranony ary manana fiara Golf 4 izy. Fa rehefa malala-tanana izy, tsy manam-petra ny finoany! Manolotra, dia manolotra, dia manolotra, dia manolotra hatrany hatrany izy… ary izay no anisan’ny talentany!
Talenta iray izay sady natolotra azy, no nosafidiany manokana mba hampiasaina ihany koa! Izy no nanapa-kevitra.
Noho izay talenta izay, nahita maso matetika ny zavatra tsy azo tanterahana ho lasa tanteraka izy! Ny alahelo lasa fifaliana! Ny ratra lasa fahasitranana ary na ny fahafatesana aza lasa fiainana…!
Eny, noho izay talenta malala-tanana izay (feno fitiavana, fikarakarana ny manodidina), nanokatra ny atao hoe “VillaVie” izy - izay toerana hihaonan’ny vehivavy, izay noho ny antony samihafa, dia mametra-panontaniana hoe hiteraka sa tsia…
Tao no nahitany ny toetra malala-tanan’i Tirza sy ny mpiara-miasa aminy, izay nandray azy tamim-pitiavana, sy ny fahamarinana izay nitondra fahafahana! (Jereo Jaona 8:32)
Hitanao fa io talenta izay azo fidiantsika ho ampiasaina io dia tena mitondra zava-mahagaga?
“Fa izao no lazaiko: Izay mamafy kely, dia kely no hojinjany; fa izay mamafy be, dia be kosa no hojinjany.” (II Korintiana 9:6)
Tsy manana ny talenta rehetra ianao. Fa misy kosa talenta izay azonao ampiasaina!
