🎩Manana ilay haingo tonga lafatra ve ianao ?

Tianao ve rehefa tsara fitafy sy madio ianao ? Tena tiako izany !

Tsaroako ny dia tany Etazonia niarahako tamin’ny vadiko — tamin’izay vao nanomboka nifankahalala. Nanararaotra ny faran’ny herinandro izahay mba hitsidika an’i Dallas, ary ny marainan’ny alahady dia nandeha nankany amin’ny fiangonana iray tao an-tanàna izahay.

Tena gaga aho nahita fa tsara fitafy daholo ny olona rehetra ! Ny lehilahy nanao akanjo feno, ary ny vehivavy nanao akanjo tsara tarehy sy tena mihaja. Samy nanana zavatra kely nampitombo endrika izay nifanaraka tanteraka tamin’ny fitafiany izy rehetra.

Ary ny tsara indrindra dia na dia nitafy toy ny mpizahatany aza izahay dia noraisina tamim-pitiavana sy tsy nisy fitsarana mihitsy. Mifanohitra amin'izany aza, tena nanosika ahy izany ka nieritreritra ny hanomboka hanao palitao aho amin'ny Alahady ! =)

Hoy ny apôstôly Paoly : “Ary ankehitriny dia ireto telo ireto no mitoetra: ny finoana, ny fanantenana, ny fitiavana: fa ny fitiavana no lehibe amin'ireo..” (1 Korintiana 13:13). Ny fitiavana dia toy ny akanjo tsara, ilay manarona sy manome hasina ny fiainantsika. Ny finoana kosa no mahatonga antsika hitafy tsara io akanjon’ny fitiavana io. Ary ny fanantenana dia toy ilay haingo manampy hatsarana amin’ny zava-drehetra.

Ny fanantenana no haingo tonga lafatra ho an’ny finoana sy ny fitiavana eo amin’ny fiainantsika. Aza adino ny mitondra azy mandrakariva ao anatinao ! Ny fanantenana no manampy anao hijery ny ho avy amim-pifaliana, hino sy hatoky amin’ny teny fikasàn’Andriamanitra. Izany no manome hery anao handroso amim-pahasahiana sy amin’ny hery vaovao.

Very fanantenana ve ianao ? Ao amin’i Jesosy no hahitanao izay rehetra ilainao, ary mihoatra noho izany aza ;)

Mitoetra ao am-poko ianao !