Manam-piadanana sa anaty ady ianao? 🕊

Indraindray isika mahatsapa fa tsy mendrika handray ny fiadanana.

Matetika isika dia mihevitra fa mifanohitra amin’ny ady ny fiadanana, saingy nandritra ny fiainako dia hitako fa tsy voatery ho izany foana. Tsy ny tsy fisian’ny ady akory no ilazana ny fiadanana. Raha ny marina, afaka mahatsapa fiadanana ianao na dia eo anivon’ny tafio-drivotra ratsy indrindra aza.

Tsarovy ilay andininy nodinihintsika tamin’ny andro voalohan’ity andiany ity. Nilaza izy fa ny Fanahy Masina no mamokatra ao amintsika fitiavana avy amin’Andriamanitra izay miseho amin’ny alalan’ny “fiadanana mpandresy”. Fantatrao ve nahoana Andriamanitra no miresaka momban’ny hoe “fiadanana mpandresy”? Manome fiadanana Izy izay mandresy ny toe-javatra rehetra. Tsy ho resy na dia amin’ny tafio-drivotra mafy indrindra aza izy io, satria fantany fa eo ny Tompo hampitony ny rivotra.

Ny fitiavan’Andriamanitra no mampitony sy mampahazo fitsaharana antsika ao anatin’ireo toe-javatra sarotra. Hoy ny Baiboly: “Ary ny fiadanan'Andriamanitra, izay mihoatra noho ny fahalalana rehetra, hiaro ny fonareo sy ny hevitrareo ao amin'i Kristy Jesosy. ” (Filipianina 4:7). Io fiadanana io dia misy ho anao ihany koa, ry namako. Te hampitobaka izany fiadanana izany ao amin’ny fiainanao Andriamanitra, mba ho azon’ny olona rehetra manodidina anao koa. Rehefa velona miaraka amin’izany fiadanana izany ianao, dia miova ny zava-drehetra!

Te hivavaka hiaraka amiko ve ianao izao? “Tompo ô, mangataka Aminao aho mba hameno Ahy amin’ny fiadananao, ilay Fiadanana marina izay mandresy amin’ny toe-javatra rehetra. Tiako ny fitiavanao ho tena hita eo amin’ny fiainako ka ho vokatra mivantana avy amin’izany ny fiadananao. Misaotra Anao aho, satria fantatro fa miasa ao amin’ny fiainako Ianao, ary miaraka amin’ny Fanampianao, dia hitombo ao amiko hatrany ny fiadananao. Amin’ny anaran’i Jesosy, Amen!”

Mitondra anao ao am-poko aho.