Mampiakatra anao ambony ny fifaliany!

Efa naniry hanao zavatra toa tsy ho vitanao ve ianao?
Tsaroako ny hetsika lehibe iray izay nivorian’ny fiangonana maro mba hikarakara hetsika manokana tao an-tanàna iray.
Sarotra tamiko foana ny manatona olona mba hiresaka amin’izy ireo momba an’i Jesosy Kristy. Tena niavaka anefa io herinandro io: Feno fifaliana aho noho izay rehetra nataon’Andriamanitra, ary tena naniry ny handeha lavitra kokoa aho.
Fantatrao ve ny zavatra nitranga? Nanomboka niresaka tamin’olona maro aho. Io fifaliana io dia namela ahy handrava sy handresy ny tahotro. Nanomboka nandroso sy nivoatra aho, tamin’ny firesahana amin’olona maro kokoa.
Tamin’ny faran’ny herinandro dia nahavita niresaka momba an’Andriamanitra tamin’ny olona 16 aho, ary ho an’ny ankamaroan’izy ireo, dia hitako fa tena resy lahatra izy ireo. Tena fahagagana ! =D
Eny, ry namako, ny fifalian’ny Tompo dia mampirisika anao handray fanapahan-kevitra amin-kerim-po, ary hahavita zavatra izay tsy vitanao hatramin’izao. I Jesosy Kristy no ohatra tonga lafatra amin’izany satria “ mijery an’i Jesosy, Tompon’ny finoantsika sy Mpanefa azy, Izay naharitra ny hazo fijaliana, fa tsy nitandro henatra, mba hahazoany ny fifaliana napetraka teo anoloany, ka dia efa mipetraka eo amin’ny ankavanan’ny seza fiandrianan’Andriamanitra Izy”. (Hebreo 12.2)
Ny hafaliana noho ny famonjeny antsika no nanosika Azy hanao ny dingana feno herim-po indrindra izay tsy mbola nisy hatramin’izay!
Inona avy ireo zavatra manokana toa tsy ho vitanao, nefa tianao hotanterahina ihany? Makà fotoana kely hivavahana sy hifaliana ao amin’ny Tompo anio. Ary amin’ny finoana, manaova dingana voalohany! Ho hitanao fa noho ny fanampian’ny Tompo dia hanao zavatra miavaka ianao =)