Mamelà heloka
Tena tsy vitako kah!!!….Sorena aho indray andro ary namela ny fahasorenako nanenika ahy. Nisy olona nampiako nefa dia novaliany fanaratsiana sy eso ary fanalam-baraka izany. Nihaino ireo resaka rehetra aho dia nieritreritra ny hamaly….. Kanjo hoy ny Tompo hoe tsy izany ny Sitrapoko. Dia avelanao ho afabaraka eto izany ny mpanomponao? Avelao aho hamaly fa efa tsy rariny intsony…. Tsia hoy ny Tompo. Vao maika aho sorena fa niezaka koa nampangiana ny tao anatiko satria tsapako nahazo vahana ny ratsy. Rehefa iny aho tonitony iny dia nibitsika mangina ny Tompo hoe mba tsaroanao moa ny nanjo an’i Jesosy?
Jesosy dia nahafoy ny lanitra ho anao. Niaritra ny mafy indrindra Izy mba hamonjena anao. Nalaina baraka, nororàna, nokapohina, ary novonoina ho faty. Tsy nanao na inona na inona anefa Izy afa-tsy ny nitia anao. Ndriiiii….. kotsan-dranomaso aho. Efa hainy fa izay ny iraka nampanaovina Azy hatrany am-boalohany fa nankató hatramin’ny farany Izy…. ho anao! Nangataka ihany Izy ny hanalana ny kapoaka nefa hoy Izy hoe : “ Raiko ô, raha azo atao, dia aoka hesorina amiko ity kapoaka ity; nefa aoka tsy ny sitrapoko anie no hatao, fa ny Anao.” (Matio 26:39)
Tsy ny sitrapoko fa ny Anao. Ny sitrapoko dia izay mahafaly ny nofoko, ny hanadio ny momba ahy eraky ny tanana, ny hanazava fa ilay olona no ratsy fa tsy izaho…. fa tena menatra aho avy eo. Marary ny fanalam-baraka, mampitroatra ny tsy rariny… fa nefa Jesosy nanoloana ireny dia nangina, tsy niteny firy fa natrehiny ny iraka nampanaovina Azy. Olona nohariany ireo namadika sy namono Azy ireo nefa dia mbola vitany ny niteny hoe : “Raiko ô, mamelà ny helony, fa tsy fantany izay ataony” (Lioka 23:34)
Hatraiza no mety ho refim-pankatoavanao ny Tomponao? Kristianina-mitondra ny Anaran’i Kristy isika, meteza hanahaka Azy sy hitondra am-boninahitra izany lova lehibe nomeny anao izany ka eny, aoka ny Sitrapony no hatao sy ho tanteraka.
Fahagagana ianao!
