Izay mikendry anao…
Inona no atahoranao amin’izao fotoana izao ?
Ady lova ? Taratasy mikasika ny hetra ? Faktioran-jiro manaraka ? 👨💻
Ireo izay mikiky ny fifandraisanareo mivady sy mitady handrava izany ? Sa ilay nofy izay napetrak’Andriamanitra ao am-ponao sy niezahanao efa hatry ny ela…kanefa mety mbola tsy hahomby indray ?
Henoy tsara aho fa ara-baiboly ity lazaiko anao ity : Afaka matoky FOANA ny fidirana an-tsehatra ny hery ambony kokoa ianao !
Mety efa tao anaty sidina ✈️ izay tsy maintsy najanona angamba ianao : “Antony tsy azo hioharana”, ny filaza azy.
Zava-mitranga tsy nampoizina sy ivelany.
Fa tsy midika akory izany hoe satria tsy niomana amin’izany isika…dia tsy hitranga izany !
Ary izany indrindra ny tian’Andriamanitra tenenina aminao anio : “Na dia tsy manantena intsony aza ianao dia hiditra an-tsehatra Aho ! Satria, Izaho, ilay Tompo Andriamanitrao, no “antony tsy azo hioharana” izay azonao ianteherana amin’ny fotoana rehetra !”
Eny tokoa, tena tsara loatra izany ! 😍
Afaka manantena FOANA ny fidiran’Andriamanitra an-tsehatra ianao !
“Fa izao no lazain'i Jehovah, Tompon'ny maro: … fa izay mikasika anareo dia mikasika ny anakandriamasony.” (Zakaria 2.12) Tsy tena mampahery be ve izany ?
Manonòna fiainana amin’ny toe-javatra misy anao, dia hiasa Andriamanitra !
🙏🏻 Manasa anao hanao ity vavaka ity miaraka amiko : “Misaotra Ray, satria tena sarobidy loatra eo imasonao aho ! Misaotra satria afaka manantena Anao hiditra an-tsehatra amin’ny fiainako aho. Eny, miantehitra Aminao aho - ilay hany “antony tsy azo hioharana” marina. Amen!”
Mirary tontolo andro feno izany Hery Ambony indrindra izany ho anao aho, izay hiasa hanome anao fandresena !
Fahagagana ianao !
