Inty aho

Tsy afaka ny hiresaka ny vehivavin’ny fankatoavana ao amin’ny Baiboly isika ka tsy hiresaka an’i Maria, renin’i Jesosy.

Vehivavy nivonona ho hampiakarin’i Josefa ho vady no indro bevohoka, anefa mbola tsy nahalala lahy.. izany hoe virijiny. Efa mba nosaininao ve hoe tahaka ny ahoana ny fihetsiky ny manodidina nandre izany? Eeehhh, tsy virijiny akory…. vehivavy maloto fitondran-tena…. tsy mendrika sns… Iza no hino hoe nisy anjely ange nilaza taminy fa hanana anaka izy? I Josefa aza moa saika hamela azy mangingina…

Fa nisafidy ny hankató i Maria. Mety nandalo tao an-tsainy daholo ireo fanontaniana ireo, fa namaly ny antson’ny Tompo izy nanao hoe : «Inty aho ankizivavin'ny Tompo, aoka anie ho tanteraka amiko araka ny teninao.» (Lioka 1:38)

Mety mitabataba koa ny manodidina hoe io fivavahana io ihany, lany andro any, aiza dia isan'andro izao… Mety mbola tsy misy vokatra ary mety hiandry elaela mihitsy izany satria i Maria nila bevohoka 9 volana sy nahalehibe ny zaza ary efa 30 taona Jesosy vao nanomboka ny ministerany…. fa teo foana Maria, nanaiky ho ampiasain’ny Tompo, tsy namotsitra, hatramin’ny farany. 

Ianao koa aza mamotsitra. Avelao hitabataba ny manodidina, fa fantaro fa “lehibe Izay ao aminareo noho izay ao amin'izao tontolo izao.” (1 Jaona 4:4). Aza kivy fa lalana mankany amin’ny voninahitra no hizoranao rehefa misafidy hankato an’Andriamanitra ianao. Hanandratra anao Izy ary firenena maro no ho tahianao!! Izay ange no tao am-kibon’i Maria eee : Ilay Mesia, famonjena izao tontolo izao. Aleloia! 

Manan-javatra ianao, meteza ho ampiasain’ny Tompo dia ho hitanao fa goavana ny hivoaka avy aminao ka na ianao aza ho talanjona. Aza adino fa manompo Andriamanitra lehibe ianao ary misafidy anao Izy ho fantsom-pitahiana koa anio. Hamaly ny antso ve ianao toa an’i Maria?

Fahagagana ianao!