Inona ny fangatahanao sahisahy indrindra ?
Inona ny fangatahana sahisahy indrindra nataonao tamin’Andriamanitra ? Hitanao, ilay karazana fangatahana tena manan-danja ka atahoranao ny mizara azy amin’ny hafa, noho ny tahotr’izay mety ho lazainy.
Nanofy i Solomona mpanjaka fa nomen’Andriamanitra azy izay rehetra nangatahiny. Zavatra iray ihany anefa no nangatahan’i Solomona : ny fahendrena hahalala ny fomba fitondrana ny olony. Nandraraka fahendrena tao am-pony Andriamanitra mandrapahatongany ho ilay olona hendry indrindra tamin’ny fotoan’androny, ary nampiany fahefana sy harena tsy hita isa toy izany koa nandritra ny fanjakany.
Nahita sitraka manokana avy tamin’Andriamanitra i Solomona nandritra ny fiainany manontolo, saingy rehefa tratra antitra izy dia nivadika tamin’Andriamanitra. Hoy ny Baiboly : « Fa nony efa antitra Solomona, dia navilin’ny vadiny ny fony hanaraka andriamani-kafa, ka ny fony tsy mba nahitsy tamin’i Jehovah Andriamaniny tahaka ny fon’i Davida rainy » (I Mpanjaka 11:4). Ahoana no nahatonga ny olona hendry indrindra tamin’ny androny ho diso lalana toy izany ?
Ry namako, nanana fifandraisana tamin’olona tsy nanaraka an’Andriamanitra i Solomona :
- Tsy nankatò ny modely nomen’Andriamanitra izy satria nanana vady maro.
- Tsy nankatò ny lalàna izy satria maro tamin’ireo vadiny no tsy Israelita.
Rehefa nandeha ny fotoana dia vitan’ireo vadiny ireo ny nampiondrika ny fon’i Solomona teo anatrehan’ireo andriamanin-kafa. Tonga nanjavona nony farany izay nazava taminy tany am-piandohana, ary lasa nanao ny tsy fanao izy.
Ry namako, tena zava-dehibe ny manodidina ny tenantsika amin’olona mitaona amin’ny tsara eo amin’ny fiainantsika. Te hivavaka ho anao aho : « Tompo o, mangataka Anao aho hanampy ity namako ity hanodidina olona izay ho fitahiana ho an’ny fiainany. Ary eo amin’ny sehatra izay tsy azoko safidiana, mivavaka Aminao aho mba ho fahazavana mamirapiratra izay mitahy sy mitaona ny hafa, ho voninahitry ny Anaranao. Amin’ny Anaran’i Jesosy. Amen ! »
