😱 Ho talanjona ianao

Inona izao no ahiahinao rehefa nifoha ianao tamin’ny maraina ?Ahiahy momba ny hoavinao ? Sa ny haben’ny asa miandry anao ? Sa ilay resaka fifantenana asa izay mampitaintaina anao efa ela ? Sa angamba ilay fiarahanareo izay mitady ho rava ? Fantatrao ve ny fomba hamalian’i Jesosy ireo fanontaniana rehetra ireo ?

“Raha manana finoana hoatra ny voan-tsinapy iray aza ianareo ka hiteny amin'io tendrombohitra io hoe: Mifindrà erỳ , dia hifindra izy; ary tsy hisy tsy ho hainareo hatao” (Matio 17.20-21)

Mampahery ery izany, manoloana ireo ahiahy rehetra atrehintsika, sa tsy izany ? Mino ve ianao fa mety ho anjaranao koa io teny io ? Sy hoe afaka manova tsotr’izao ilay olana lehibe atrehananao io ho lasa fahagagana Andriamanitra?

Vao aingana mihitsy aho no niaina olana toy izany. Nisy tsy fifankahazoana nipoitra teo amin’ny finamanana iray izay tena sarobidy tamiko, ary natahotra aho sao tsy ho voavonjy intsony izany. Indrisy, tsy teo an-toerana mihitsy aho fa nanao iraka nandritra ny andro vitsivitsy tamin’izay, ka tsy afaka namaha izany mivantana.

Dia tonga tamiko ny feon’Andriamanitra niteny hoe : “Heverinao fa tsy afaka miatrika io olana io ho anao ve Aho ?” Tena mahatsikaiky satria amin’ireny toe-javatra ireny, matetika isika mieritreritra hoe : “Izaho mihitsy no tokony ho eo, mba hiresaka sy hanazava ny zava-drehetra.”

Fa Andriamanitra dia mitsiky am-pitiavana, satria mbola manan-kery hatrany ilay fanambarany hoe : “Raha manana finoana ohatra ny voan-tsinapy… tsy hisy tsy ho hainareo hatao” (Matio 17.20)

Ny farany dia nandray fanapahan-kevitra aho : ny hino mba ho talanjona !

Tamin’ny faran’ny tontolo androko, rehefa avy nanao fampisehoana aho ka reraka sy nidaboka teny ampandriana… dia iny fa tonga ny vaovao mahafinaritra : voavaha tanteraka ireo tsy fifankahazoana nisy, ary tsy hoe avotra fotsiny ilay finamanana, fa vao mainka aza nihamafy sy nihanatanjaka !

Ianao koa, manapaha-hevitra ny hino anio dia ho hitanao fa hifarana amin’ny fahagagana ny tontolo andronao !

Fahagagana ianao !