Fijery feno fankasitrahana…

Hoy ny mpanoratra ny andininy fahatelo izay hitako fa tena mafonja ao amin’ny bokin’ny I Tesaloniana : « Misaora amin’ny zavatra rehetra; fa izany no sitrapon’Andriamanitra ao amin’i Kristy Jesosy ho anareo. » (1 Tesaloniana 5:18).

Io no iray amin’ireo andininy tiako indrindra amin’ity andalana ity, ary heveriko fa iray amin’ireo mafonja indrindra.

Jereo ny voalaza ao: “Misaora AMIN’NY ZAVATRA REHETRA…”. Amin’ny toe-javatra rehetra, na amin’ny tsara na amin’ny ratsy.

Ny fankasitrahana dia iray amin’ireo fanalahidy lehibe amin’ny fiainana kristiana, noho ny antony roa :

–          Mitarika antsika hankasitraka izay omen’Andriamanitra izany : ny fotoana tsirairay, ny zavatra tsirairay, ny olona tsirairay, ny fahafahana tsirairay… dia fanomezana avy amin’Andriamanitra. Na dia ao anatin’ny fotoan-tsarotra aza, dia afaka mahita ny fahatsaran’Andriamanitra manodidina antsika isika.

–          Maneho ny fitokiantsika tanteraka an’Andriamanitra izy io, indrindra fa amin’ny fotoana izay tsy takatsika ny zava-mitranga. Manapa-kevitra isika noho izany tsy hifantoka amin’ilay olana, fa amin’Ilay nanolotra ny ainy teo amin’ny hazo fijaliana mba hamonjena antsika, sy ny Fampanantenany mandrakizay ho an’ny fiainantsika.

Ny fisaorana dia toetran’ny fo : anjaranao ny manapa-kevitra na te hiaina fiainana feno fankasitrahana ianao na avelanao hifehy anao ny fitarainana.

Raha ny marina dia  izany no mampiseho ny vokatry ny fifandraisanao amin’Andriamanitra.

Ireo mpianatra izay nokapohina noho ny fitoriana an’i Jesosy dia afaka ny ho tafintohina sy nitaraina tamin’Andriamanitra ka nanao hoe : “Ny teny izay nolazainay dia izay nasainao ho torinay, kanefa avelanao ho menatra sy hokapohina izahay”.

Raha ny zava-misy dia mifanohitra tanteraka amin’ny zavatra tsapan’izy ireo izany hevitra izany. Tena akaiky an’Andriamanitra izy ireo ary feno ny Fanatrehany, ka afaka nanova ny toe-java-misy. Raha ny marina, ny Baiboly dia milaza fa tena « faly, satria natao miendrika hitondra fahafaham-baraka ho voninahitr’izany anarana izany.m» (Asan’ny Apostoly 5:41).

Izany no vokatry ny fankasitrahana eo amin’ny fiainantsika ! Mitarika antsika hiaina mandrakariva ny fandresena ananantsika ao amin’i Kristy izany, na dia ao anatin’ny toe-javatra sarotra aza.

Ry namako, aza manaisotra ny tenanao amin’ny fanehoanao fankasitrahana an’Andriamanitra !