🗓 Fantatr’Andriamanitra ny andro handraisanao ny Teny Fikasany!

Eo am-pelatanan’Andriamanitra ny fotoana, ary ny fotoanany dia lavorary. Raha ny marina, matetika dia tsy mitovy amin’ny antsika mihitsy ny fandaharan’Andriamanitra!

Azo antoka fa efa henonao imbetsaka ity andininy ao amin’ny Baiboly ity hoe: “ny indray andro amin'ny Tompo dia toy ny arivo taona, ary ny arivo taona toy ny indray andro...” (2 Petera 3:8)

Raha arivo taona ny andro iray amin’ny Tompo, dia roa arivo taona ny roa andro, ary afaka miezaka manao kajy isika mba haminavina izay hataon’Andriamanitra. Fa rehefa mitovy amin’ny arivo taona ny andro iray, ary mitovy amin’ny indray andro ny arivo taona, dia manimba ny lojikan'olombelona rehetra izany… Mihoatra ny fahatakarantsika tanteraka izany!

Ary io no fanalahidy: tsy antsoina isika mba hifehy sy hitarika ny zava-drehetra mitranga eo amin’ny fiainantsika, fa mba hanaiky ho tarihany. Marina fa tsara ny mandamina, manana tanjona, mametrapetraka tsara ny fotoantsika… nefa ny fiainana dia mihoatra lavitra noho izany rehetra izany.

Andriamanitra dia miantso antsika hiankina tanteraka Aminy sy hanaraka ny toroheviny, eo ambanin’ny fitarihan’ny Fanahy Masina amin’ny zavatra rehetra ataontsika.

Mampahery antsika ity andininy mahafinaritra ity: “Ary aza mba ketraka amin'ny fanaovan-tsoa isika; fa amin'ny fotoan'andro no hijinjantsika, raha tsy reraka isika.” (Galatiana 6:9)

Indraindray dia toa mahatsiaro isika fa mamafy fotsiny, nefa tsy azontsika antoka hoe hisy vokany izany, na ny fomba ahatanterahin'izany… ary mety hanakivy antsika izany, indrindra rehefa mandeha ny fotoana nefa tsy misy fiovana.

Fa jereo tsara izay ambaran’ilay andininy: amin’ny “fotoan’andro”, amin’ny fotoana nomanin’Andriamanitra, no hahatongavan’ilay vokatra, ilay fitahiana hita maso avy amin’Andriamanitra izay nandrasantsika. Raha ny marina, efa napetrak’Andriamanitra izany fotoana izany! Fantany mihitsy aza ilay andro! Wouah! =)

Efa ho tonga ilay andro hahazoanao ny Teny Fikasana avy amin’Andriamanitra!

Aza manahy intsony ny amin’ny hoe rahoviana izany no ho tonga: tohizo amin’ny fahatokiana sy fiadanana ny fanaovana ny tsara izay iantsoan’Andriamanitra anao anio amin'ny fahatongavan-tsaina fa miha-manakaiky ny Fotoanany. Lavorary ny fotoanan’Andriamanitra! 😉