🌤 Ety an-tany tahaka ny any an-danitra!
Tonga amin’ny andro farany amin’ity andian-dahatsoratra ity isika, ka handinihantsika ny iray amin’ireo andinin-teny malaza indrindra ao amin’ny Baiboly. Samy te hilaza ity teny ity isika rehetra rehefa tonga ny fotoana hahafatesana, izay hidirantsika ao amin’ny Fiainana Mandrakizay:
“Efa niady ny ady tsara aho; nahatanteraka ny fihazakazahana aho; nitahiry ny finoana aho; hatrizao dia tehirizina ho ahy ny satro-boninahitry ny fahamarinana, izay homen ny Tompo, Mpitsara marina, ho ahy amin izay andro izay; ary tsy ho ahy ihany, fa ho an'izay rehetra tia ny fisehoany koa.” (2 Timoty 4:7-8).
Isan'andro dia tsy maintsy miatrika ady ara-panahy vaovao isika, sy mandray fandresena vaovao avy amin'i Kristy, ary manatratra haavo vaovao amin'ny fifandraisantsika amin'Andriamanitra… Dia afaka manohy mandroso amin'ny fomba mirindra sy mahery isika, raha toa ka misy fahitana mirehitra, na zavatra mampirehitra sy mampientanentana ny fontsika, eo anoloantsika.
Mahavita mahafoy zavatra maro ireny atleta sangany ireny satria zavatra iray ihany no ao an-tsainy: hibata ny fandresena. Mahatonga azy ireo ho tonga saina kokoa ny amin’ny fotoana ananany sy ny ezaka tokony hataony isan'andro izany mba hanatratrarana ny tanjony.
Tsy misy tanjona lehibe indrindra noho ny hiaina ny fiainantsika amin’ny fanoloran-tena tanteraka amin’Andriamanitra, sy hiaina ny heriny ary ny voninahiny, eto sy ankehitriny, eo amin’ny fiainantsika andavanandro. Tsy misy azo ampitahaina Aminy!
Rehefa manandrana ny Fanjakany sy ny Voninahiny isika, dia mahatsapa fa Izy irery ihany no tena afaka manome fahafaham-po antsika. Amin'io fotoana io no andraisantsika ny faharesen-dahatra fa ny Lanitra dia ho toerana tena mahafinaritra… Tena tsy mampino hoe anio isika dia tsy mahatsapa afa-tsy sombiny kely, nefa io sombiny kely io dia tena mahasarika antsika!
Ry namako, avelao ny Lanitra handrehitra ny fonao, ary avelao ny fanahinao hanana hanoanana ny hijanona ho eo akaikin’Andriamanitra isan’andro. Anio, mangataha amin’Andriamanitra mba handrehitra ny fonao amin’ny firehetam-po sy tanjona nohavaozina, izay manosika anao hitombo sy handroso araka izay tratra, manomboka izao, ary mandritra ny androm-piainanao eto an-tany, “mibanjina an’i Jesosy, Tompon’ny ny finoantsika.” ( Hebreo 12:2).
Efa nanomana zavatra maro ho anao Andriamanitra, eto an-tany sy any amin’ny mandrakizay!🤗
Fahagagana ianao!
