😴 Aza mijanona amin’ny torimasonao !
“Ny fahorian'ny foko efa mihalehibe; afaho amin'ny fahatereko aho.” (Salamo 25.17)
Kay, izany ka Salamo ! “Afaho amin’ny fahatereko aho !” Inona no mbola mampatahotra anao, nefa efa renao ny tenin’Andriamanitra ary fantatrao tsara izay andrasany aminao ?
Tsy fantatro izay mety ho toe-javatra iainanao, fa fantatro kosa fa manana drafitra tsara ho anao Andriamanitra.
Mety angatahiny aminao ve ny hamarana fifandraisana ratsy iray ? (faly aho fa afaka miresaka mivantana aminao eto). Mety ho nangatahiny ve ianao hanao dingana ho amin’ny fahaleovan-tena ? Sa angamba miantso anao hanaraka sekoly ara-Baiboly Izy ? Sa tsotra fotsiny, nangatahiny ianao hiala amin’ny fitarainana fa hiaina amin’ny fonao manontolo isan’andro?
Azoko antoka fa nampiditra hevitra iray tao am-ponao Andriamanitra tamin’ity herinandro ity, ary mampientana anao izany…
Fanairana ho amin’ny fifohazana io ! Aza mijanona amin’ny torimaso !
Eny, azonao atao ny manemotra izany, tahaka ny fanaonao amin’ny “réveil” amin’ny findainao. Fa tadidio : amin’izay fotoana very izay, dia mety ho diso anjara amin’ny fahagagana nomanin’Andriamanitra ho anao ianao !
Diniho vetivety ity sary ity : Ianao, mijoro eo anoloan’Andriamanitra, ary Izy mampiseho aminao izay noeritreretiny ho anao. Ary indrisy, fantatrao fa tsy noraisinao ilay izy ary nitsotra ianao hoe : “Azafady, fa tena resi-tory aho”.
Andriamanitra dia feno famindram-po, fahari-po ary feno fitiavana antsika ! Vakio tsara ilay voasoratra ao amin’ny Jona 4.2 : “satria fantatro fa Hianao dia Andriamanitra mamindra fo sy miantra, mahari-po sady be famindram-po ary manenina ny amin'ny loza.” Eny, na dia resi-tory aza isika hatreto. Nefa aza adinoina fa ao ambadiky ny fanekenao Azy no misy ny fahagagana miandry anao !
Eny, miafina. Satria tsy mbola hitan’ny masonao, fa raha hanao ilay dingana amin’ny finoana ianao, dia ho hitanao amin’ny fiainanao ilay fahagagana !
Angataho amin’Andriamanitra anio ny hanafahany anao amin’izay rehetra mbola mampatahotra anao. Satria hoy Izy : “Indro, Izaho efa hanao zava-baovao, koa ankehitriny dia efa miposaka izany !” (Isaia 43.19)
Mitrakà ary jereo ny eo anoloanao !
Fahagagana ianao
