🦁 Aza mandositra ny fahavalonao !
Fotoana vitsy lasa izay, nahare ny tantarana kristianina iray aho izay nandeha nitsangatsangana tany anaty ala tao amin'ny tanàna nahaterahany tany Etazonia, ary tampoka teo dia nihaona mivantana tamina “puma” izy. Liona avy any an-tendrombohitra izany, ary anisan'ny tena mamono mahafaty izy ireny.
Na dia feno tahotra aza izy tamin'ny voalohany, dia nahay nitazona ny fitoniany sy ny fahanginany. Ny raibeny, manampahaizana momba ny tendrombohitra no nampianatra azy tamin'ny fahazazany izay tokony atao raha sendra mihaona amin'ny puma hono izy indray andro. Indrindra indrindra, tsy tokony handositra, satria raha manao izany izy dia ho lasa lasibatra mora ho an’ilay biby.
Tsy nisy safidy hafa ho azy afa-tsy ny mijoro sy miatrika ilay liona. Tsy tokony haneho ny tahotra mihitsy izy. Nandritra izany, nijery mivantana ilay biby izy, ka nanomboka nanetsika ny sandriny tamin'ny fomba mampatahotra, feno herim-po sy hatezerana tahaka ny biby manan-kery.
Ilay liona kosa dia mbola namoaka feo feno fanafihana, sady nandinika ny fihetsiny. Afaka segondra vitsy izay toy ny ora maro, dia nanao fihetsika feno hery ilay vehivavy, niaraka tamin'ny fikiakiaka toy ny biby… ka farany, nandositra ilay liona. Tsy naratra izy na kely ary. Misaotra an’ny Tompo !
Hoy i Petera ao amin'ny Baiboly : "Mahonòna tena, miambena: fa ny devoly fahavalonareo mandehandeha tahaka ny liona mierona mitady izay harapany; tohero izy, ka miorena tsara amin'ny finoana ianareo, satria fantatrareo fa izany fahoriana izany dia manjo ny rahalahinareo rehetra eran'izao tontolo izao. " (1 Petera 5:8-9)
Ny fahavalon'ny fanahy dia tahaka io liona io ao amin'ny tantara. Izy dia miezaka hamitaka antsika mba hinoantsika fa “lehibe” izy, ary miezaka mampihorohoro antsika amin’ny feony feno lainga sy fampitahorana. Saingy ny Tenin'Andriamanitra no manome ny vahaolana hahazoana fandresena : mila sahy miatrika sy miady amin'ilay fahavalo isika.
Ry namako, aza mandositra ny fahavalonao…fa ampandosiro amin'ny anaran'i Jesosy izy!
Mandritra ny andro manaraka, hanome fanalahidy maromaro avy amin'ity andininy ao amin'ny Baiboly ity aho. Ireo fanalahidy ireo dia hanampy anao hahalala ny fomba hijoroana tsara eo anoloan’ny fanafihana sy ny lainga avy amin'ny aizina ao amin'ny fiainanao.Mino aho fa hahita fandresena lehibe ianao!
Tena fahagagana ianao!
