Aza diso fanantenana intsony ! 🥰

Vao haingana ve ianao no diso fanantenana? Raha izaho aloha dia eny.

Ary mino aho fa isika rehetra dia samy miaina fahadisoam-panantenana indraindray eo amin’ny fiainana ary ny tena marina dia isika koa dia mety handiso fanantenana ny hafa… Izany no mahatonga ity vavaka anio ity ho tena sarobidy amiko, satria mila ny fiarovany isika — tsy voatery amin’ny fahadisoam-panantenana ihany, fa amin’ny vokatr’izany rehefa tsy voatantana araka ny tokony ho izy.

Izao no lazain’ Andriamanitra : “Izaho no Jehovah, ka tsy ho menatra izay miandry Ahy.” (Isaia 49:23)

Andeha hivavaka isika :

“Hay mba tena misy Olona iray izay tsy handiso fanantenana ahy mihitsy!” Izany no eritreritro voalohany rehefa namaky ity andininy ity aho, Jesosy ô. Fantatro fa IANAO tsy handiso fanantenana ahy mihitsy. Fantatry ny saiko izany… fa ny foko kosa indraindray mbola mila fotoana kely kokoa. Satria misy fotoana tsy azoko ny fanapahan-kevitrao.

Fa tsy maninona izany. Satria misy zavatra lehibe kokoa noho ny fahatakarana :

Ho hitako ihany any aoriana any! 👑

Eny, ho hitako ny antony maha-tsara indrindra ho ahy ny fanapahan-kevitrao.

Ho hitako ny antony ampandalovanao ahy amin’ny zavatra sasany. Mino izany aho!

Ary tiako koa ny hitsahatra tsy ho tezitra rehefa mandao ahy na mandiso fanantenana ahy ny olona… Satria izaho koa anie ka mety handiso fanantenana ny hafa indraindray.

Anio, akatoko io varavarana mankany amin’ny fahadisoam-panantenana io.

Satria fantatro Ianao — Ilay tsy mba mandiso fanantenana mihitsy!

Misaotra Anao, Jesosy ô, satria hiara-handalo ity andro ity isika, tsy ao anatin’ny fahadisoam-panantenana — fa ao anatin’ny fitiavana sy ny firaiketam-po!

Satria fantatro izao :

Izay mamela ny tenany ho resin’ny fahadisoam-panantenana… dia namela ny tenany ho voafitaka raha ny marina.

Misaotra Anao miaro ahy amin’izany! Misaotra Anao, Jesosy ô!

Misaotra noho ny Fanatrehanao eo amin’ny fiainako! Amen.”

Fahagagana ianao!