Aza avela hameno anao ny fanahiana
Manontany ahy matetika ny olona hoe izaho tokoa ve no manoratra ireo lahatsoratra rehetra ireo, isan'andro isan’andro. Hatreto dia mamaly tamim-pitsikiana aho hoe: "Mazava ho azy, ary mahafinaritra ahy izany!"
Tsotra ny valinteniko. Ny hany fanahiako dia ny fitadiavana fotoana handraisana an-tsoratra ireo hevitra rehetra mihodinkodina ao an-dohako!
Vao haingana anefa aho no nandalo fotoana tena nangidy. Nahatsiaro ho kivy sy nalahelo aho—tsy nisy antony mazava—ary nitohy nandritra ny herinandro maromaro izany. Sarotra ho ahy ny nifehy ny tenako. Inona no nitranga?
Indray maraina, saika nilavo lefona aho: “Ahoana raha tsy manana zavatra hozaraina intsony aho? Ahoana raha lany hevitra aho? Ahoana raha tsy afaka mampahery ny hafa intsony aho ...?"
Fantatrao tsara angamba izany karazana eritreritra manindrona ny saina izany, sa tsy izany? Rehefa avelanao mibahan-toerana izy ireo, dia mitombo haingana ny eritreritra toy izany — ary tena manimba!
Mandra-pahatongan'ny fotoana nahatsiarovako tena ka nilazako hoe: AOKA IZAY! Satria tadidio fa tsy voatery hino ireo eritreritra rehetra ireo ianao ( raha ny marina dia lainga fotsiny ireny)! Tsy manan-jo hifehy ny fiainanao izany! Fotoana izao hametrahana azy ireny eo amin'ny toerana sahaza azy!
Aaa, izany fitiavako ny Baiboly! Raha mba hampiharintsika matetika kokoa moa izany rehefa iny resin’ny eritreritra iny isika.
“Andriamanitra no itokiako, ka tsy mba hatahotra aho.” (Salamo 56:4).
Raha toa ka manangoly anao ny eritreritrao, dia tohero amin'ny alalan'ny Baiboly izany!
Tsy mila matahotra ny ampitso na izaho na ianao, (jereo ny Matio 6:34). Kanefa, matetika loatra isika no mamela varavarana hisokatra ho an'izany tahotra izany! Toy izany koa ve ny aminao? "Mbola afaka handoa ny faktiorako ve aho rahampitso? Hifarana ve ny fifandraisako rahampitso? Ho tiana ve aho indray andro any...?"
Rehefa mavesatra aminao ny ahiahy, dia matokia an'Andriamanitrao izay miasa!
Vonona ve ianao anio handray an-tanana ny eritreritrao sy hanome toerana ho an'ny fahamarinan'Andriamanitra? Avelao ny tahotrao hiaina ny herin'Andriamanitrao izay tsy azo hozongozonina!
Fahagagana ianao!
