☝ Ataovy voalohany, mialohan’ny….

Hiezaka hahatakatra bebe kokoa ny andininy faha-5-7 amin’ny toko faha-3 amin’ny bokin’ny Ohabolana isika anio. Vonona amin'izany ve ianao? Azoko lazaina fa ny fisaintsainana mifandray amin'ireo andininy ireo dia namporisika ahy hatoky an'Andriamanitra bebe kokoa ary hametraka Azy tsy tapaka amin'ny zavatra rehetra ataoko! Ary ny tena zava-dehibe dia, mitondra fifaliana antsika izany rehefa miaina an-tsitrapo miaraka Aminy isika! Maniry aho mba hahatsapanao izany koa!

“Matokia an'i Jehovah amin'ny fonao rehetra, Fa aza miankina amin'ny fahalalanao; Maneke Azy amin'ny alehanao rehetra, Fa Izy handamina ny lalanao, Aza manao anao ho hendry; Matahora an'i Jehovah, ka mifadia ny ratsy” (Ohabolana 3:5-7)

Vonona ve ianao hisaintsaina ny hevitr’izany miaraka amiko? Efa imbetsaka isika no nandre an’io andininy io. Azo inoana fa efa nampiasa io andinin-teny io ihany koa ho fampaherezana ny tenanao. Tena tiantsika manokana ny mampiasa izany rehefa mahatsiaro isika fa manana lalana ho antsika foana Andriamanitra, na dia mbola tsy hita ny maso aza izany, na rehefa sendra tsy fahombiazana isika, na rehefa misy olana eo amin’ny lalana tokony halehantsika.

Kanefa...!

Raha ny marina, dia tokony hihazona an’io andinin-teny io ao am-pontsika isika alohan’ny hanaovana dingana iray, alohan’ny zavatra rehetra, ary alohan’ny fanapahan-kevitra raisintsika. Izay no antony tiako hamakafakana izany fohifohy:

1- "Aza miantehitra amin'ny fahalalanao..."

Dikan'ny teny: Ohatra, misy fahafahana mahazo "vola mora" miseho eo anoloanao, saingy fantatrao tsara fa  misy zavatra tsy dia mazava miafina ao ambadik'izany. Tsy maintsy miteny TSIA ianao ary "matokia an'i Jehovah tanteraka" alohan'ny hidiranao amin'io lalana io ary mitaraina amin'Andriamanitra mba hirotsaka an-tsehatra hamonjy anao Izy.

2 - "Maneke Azy amin'ny alehanao rehetra, Fa Izy handamina ny lalanao"

Izany hoe: raha ohatra ka an-dalana handeha hiasa ianao ka vao mieritreritra ny atmosfera any am-piasana fotsiny dia efa tsy mahafaly anao, dia "Izy eritreretina" alohan'ny hirosoanao amin'ny fahakiviana. Tsarovy Ilay afaka manome fifaliana anao amin’ny toe-javatra rehetra! Ilay nahatanteraka ny zava-drehetra! Ary ho hitanao fa tsy miala amin'ny olana ianao fa miatrika an'izany, miaraka amin'ny vahaolana!

3- "Aza manao anao ho hendry…”

Mitranga matetika amintsika izany! Ary tsy manoloana ny  hafa ihany, fa matetika amin'Andriamanitra koa! Amin’ny fomba ahoana? Amin’ny alalan’ny famoronana vahaolana mialohan’ny vavaka, alohan’ny hiantsoana an’Andriamanitra. Indraindray koa aza amin'ny fahatakarana fa ny "Lalany" dia mitaky ezaka be avy aty amintsika  ...

Hametraka tanjona ve isika anio?

Ambarako fa ny Tenin’Andriamanitra no ho fiainako, na dia mbola tsy tonga aza ny olana!