👣 Araho ny fitarihan’ny Fanahy Masina!
Mandritry ny andro vitsivitsy, dia tiako raha hifantoka isika amin’ny andininy iray izay nahakasika ny foko, ary mino aho fa ho aingam-panahy lehibe ho anao izany, rehefa hodinihintsika miaraka tsara.
Rehefa nandeha teny ambonin’ny rano i Jesosy dia nanao zavatra tsy mbola nataon’olona. Tahaka ny hoe zavatra efa mahazatra izany, nefa zavatra tena hafa izay tsy takatry ny saina, ary nandrava ny tetika ratsy nataon’ny haizina hamely ny mpianany.
Fa ny tena mampitolagaga ahy dia ny hoe, tamin’ny Anarany dia nahazo hery koa i Petera, ka afaka nandeha teny ambonin’ny rano! Betsaka ny lesona sy ny fanalahidy azo tsoahana amin'ity tantara ity mikasika ny fomba fiasan’ny Fanjakan’ny Lanitra, ka andeha ary aloha hanomboka! =)
Hoy ny Baiboly: “Ary niaraka tamin'izay dia nanery ny mpianatra hiondrana an-tsambokely Jesosy ka hita eo alohany ho eny am-pita mandra-pandràvany ny vahoaka. Ary rehefa noravany ny vahoaka, dia niakatra tao an-tendrombohitra Izy mba hitokana hivavaka; ary nony hariva ny andro, dia nitoetra irery teo Izy..” (Matio 14:22-23)
Jereo anie, i Jesosy mihitsy no niteny tamin’ny mpianany hiampita mialoha Azy. Notarihin’ny Fanahy Masina hatrany Izy ary nahafantatra fa tokony hijanona lavitra kely miaraka amin’ny vahoaka mba hitahy azy ireo.
Toy izany koa no nataony, rehefa lasa ny vahoaka dia niakatra an-tendrombohitra Izy mba hivavaka. Nahatsapa Izy fa misy zavatra mitranga eo amin’ny tontolo ara-panahy ka nivavaka sy niambina Izy mba hahafahany mandray fanapahan-kevitra hendry sy mahomby.
Tsy hay azavaina fa matetika isika mahatsapa hoe misy zavatra tsy maintsy ataontsika izany, na dia tsy fantatsika tsara aza ny antony. Izany indrindra no asan’ny Fanahy Masina eo amin’ny fiainantsika: tarihiny isika hanao dingana tsy noeritreretintsika akory, nefa hahatonga antsika hahatanteraka ny Sitrapony.Ry namako, tian’ny Fanahy Masina ny hanoro lalana anao isan’andro! Ny fanontaniana dia hoe vonona hanaiky ny fitarihany ve isika, na dia midika fanovana drafitra aza izany. Tsy misy zava-mahagaga mihoatra noho ny mandeha miaraka Aminy ary mahita ny fahatanterahan’ny zavatra efa nomaniny ho antsika!
