Anio, tokony hanohy ianao,
“Miarahaba anao, tena very fanantenana tanteraka sy kivy be tamin’ny fiainako aho, ka saika namono tena mihitsy. Fa misaotra an’Andriamanitra aho fa Izy no namonjy ahy ! Niteny tamiko Izy tamin’ny alalan’ny ‘Fahagagana isan’andro’ ary nasehony ahy koa ny lalana hahazoana fanampiana. Nifikitra tamin’izany aho, ary tafavoaka velona !”
Rehefa naharay io hafatra io izahay, dia tsy nahatana ny hafaliako mihitsy aho ! 😍
Ny tena nahagaga dia izao : tamin’ny fotoana izay nahamaro olona nandalo eritreritra mitovy amin’izany no tonga io fijoroana vavolombelona io, ary maro no nizara taminay ny fahoriany. Niresaka izahay ekipa hoe inona indray no azontsika atao “fanampiny” hanohanana ireo olona sarobidy ireo.
Dia izao no nolazaiko tamin’ny ekipako :
“Ny iraka ataontsika dia ny mampita ny Tenin’Andriamanitra miaraka amin’ny fampaherezana - ary ny mivavaka. Saingy misy fetra ihany koa isika. Tsy maintsy matoky isika fa handray izany Teny izany amim-pinoana ny olona, ary avy eo izy ireo no hanao ny dingana ilaina.”
Raha fintinina : Tianay ampitaina AMINAO ny Tenin’Andriamanitra mba hampahery anao sy hivavaka ho anao.
MANOMBOKA EO, dia anjaranao ny mandray izany Teny izany sy manao ny dingana voalohany, ary avy eo mampihatra izany eo amin’ny fiainanao.
Mety ho sarotra amin’ny voalohany izany, fa Andriamanitra dia te hitondra ANAO manokana ho any amin’ny toerana kasainy, miaraka Aminy !
Ary io fijoroana vavolombelona io no tena nanohina ny foko, satria hoy ilay olona :
“Niteny tamiko Andriamanitra tamin’ny alalan’ny ‘Fahagagana isan’andro’, ary nasehony ahy koa ny lalana hahazoana fanampiana. Nifikitra tamin’izany aho, ary tafavoaka velona !”
Tsy ampy ny “mihaino” fotsiny - fa tsy maintsy “mandeha” koa isika.
“Koa ario ny fahalotoana sy ny lolompo rehetra, ary ekeo amin'ny fahalemem-panahy ny teny nambolena, izay mahavonjy ny fanahinareo. Fa aoka ho mpankatò ny teny ianareo, fa aza mpihaino fotsiny ihany ka mamitaka ny tenanareo..” (Jakoba 1:21-22)
Tsy fantatro izay sehatra iantsoan’Andriamanitra anao anio (hamela heloka ? Hanokana fotoana bebe kokoa ho Azy?), fa mampahery anao aho mba hitsangana, hihaino izany Teny izany ao am-ponao, ary handroso !
Andriamanitra dia maniry izay tsara indrindra ho anao. Ary raha amin’izay misy anao ankehitriny ka mbola tsy miaina “izay tsara indrindra” ianao, dia mety miandry anao hitsangana sy hanomboka handeha Andriamanitra !
