🛠️ Ahitsio izay tsy mety !
Efa manakaiky ny faran’ity andian-dresaka ity isika, izay nahitantsika fa lehibe ny fiantraikan’ny fahazotoana eo amin’ny fiainantsika, indrindra rehefa ampiharintsika amin’ireo lafin-javatra tena manan-danja amin’ny fiainantsika andavanandro izany.
Jereo izay lazain’i Petera amin’ity andininy ity : “Koa amin'izany, ry malala, satria manantena izany zavatra izany ianareo, efa mazotoa mba ho hita tsy manan-tsiny amam-pondro eo anatrehan'ny Tompo amin'ny fihavanana.ianareo.” (2 Petera 3:14).
Ary i Paoly koa dia mitovy hevitra amin’izany rehefa nanoratra ho an’i Timoty hoe : “Mazotoa manolotra ny tenanao amin'Andriamanitra ho olona voazaha toetra, dia mpiasa tsy mahazo henatra, mizara tsara ny teny fahamarinana.” (2 Timoty 2:15).
Amin’ireo andininy roa ireo, dia misy antso ho antsika mba ho hentitra amin’ny fanaovana ny marina, ho madio, ho ankatoavina…
Raha manafina zavatra na manao zavatra mampisalasala isika (izay tsy mahasoa antsika), dia mampiditra antsika tsikelikely amin’ny fandriky ny fahavalo izany. Ireo toe-javatra ireo dia ho lasa fandrika ho an’ny fanahintsika, ka manakana antsika tsy hahazo fahafahana marina sy tsy hiaina tanteraka ny fitahian’Andriamanitra.
Fa kosa, raha voadio amin’ny loto rehetra isika, tsy misy zavatra afenina manavesatra antsika, ary tsy voahozongozona amin’ny lasa, dia hitombo ny fahatsapantsika ny fahafahana sy ny fitahiana!
Izany indrindra no hiantsoana antsika ho mailo sy hahitsy eo amin’ny fiainantsika, mba tsy hisy zavatra hampahamenatra antsika. Fa kosa, handeha handroso amin’ny fahamarinana eo anoloany, tsy misy pentina, tsy misy fitaka, fa amin’ny fiadanana sy fahafahana…
Ry namako, tian’Andriamanitra ho afaka tanteraka ianao ary hiaina feno ny Fitahiany ! Fa mba hahatrarana izany dia ilaina ny manadino ny lasa izay mbola manakana sy misintona antsika hidina ambany, mba ahafahantsika mandray fanapahan-kevitra araka ny Sitrapony.
Izany no tiako hamporisihana anao handinika kely ny fiainanao vetivety. Mbola misy zavatra manavesatra anao ve, izay tsy mbola voalamina tsara ? Mbola misy safidy ataonao ve ankehitriny izay tsy tena hendry, ka mbola mahatonga anao hifikitra amin’ny fahazaran-dratsy taloha, manakana anao tsy handray ny fitahian’Andriamanitra ?
Manentana anao aho handray fanapahan-kevitra hentitra hanitsy ireo zavatra ireo, miaraka amin’ny fanampian’ny Tompo. Hahatsapa ho maivana kokoa ianao rehefa afaka amin'ireo zavatra rehetra ireo ary ny fiainanao dia hifanaraka amin'ny Sitrapon'Andriamanitra!
Mivavaka ho anao aho, ary mitondra anao ao am-poko.Fahagagana ianao !
