Afaka manomboka indray ianao anio…
Mazoto miasa eo amin’ny solosainao ve ianao ?
Nandritra ny fotoana nahatsapako ho “be zavatra atao”, dia tsikaritro fa maro ireo varavarankely nisokatra teo amin’ny solosainako… ny varavarankely tsirairay dia manambara ny asa mbola mila tanterahana.
Teo anelanelan’ny tranokalan’ny hotely (nila namandrika ny efitra hatoriana amin’ny hetsika manaraka aho), ny varavarankely maro handikana ny lahatsoratra momba ny Fahagagana Isan’Andro, ny mailaka maro nosokafana izay tokony valiako haingana, ny fandraiketako ny hira izay noforoniko, ary tsy adino, toriteny iray ao amin’ny Youtube izay tena nahaliana ahy, dia natahotra aho sao misy adinoko izany !
Mazava ho azy fa tena zava-dehibe daholo izany rehetra izany. Mandra-pahatonga an’ilay solosaina maty ary niverina nisokatra ka nanjavona daholo ny zavatra rehetra ! Azoko avy hatrany ny zavatra nitranga. Namela varavarankely maro loatra nisokatra aho. Eny, na isika aza matetika, dia mamela ny adin-tsaina hanenika antsika !
Imbetsaka Andriamanitra no nanitsy ahy moramora : “Be loatra…”, fa hainao ve ity eritreritra ity hoe : “Raha te handroso aho, dia mila…” ? Ny torohevitro ho anao dia :
Mitsahara fa avelao Andriamanitra hiditra an-tsehatra !
Raha ny momba ahy, tena nety ny nanidian’ny solosainako ireo varavarankely rehetra. Afaka miainga amin’ny tsy misy indray aho anio. Ary tena nilaiko io fanombohana vaovao io. Satria eo no nanapahako hevitra - eny, izao indray - ny hangataka fahendrena amin’Andriamanitra mialohan’ny hanombohana…
Inona avy ireo varavarankely mila arindrinao ka hanombohanao indray miaraka Aminy ?
“Ankino amin'i Jehovah ny lalanao, ary matokia Azy, fa hataony tanteraka.” (Salamo 37.5)
Tsara loatra izany andininy izany ! Andeha hino sy hiaina izany isika !
Fahagagana ianao !
