🧼Fanahy  “voadio”…

Mivavaka aho mba ho afaka hiaina fanavaozana mahery vaika amin’ny fomba fisainanao tsikelikely  ianao, ary hahita ny vokatra voalohany eo amin’ny fiainanao. Te hanafaka antsika ao Aminy sy amin’ny fahamarinany Andriamanitra !

Araka ny efa nolazaiko taminao, indraindray dia misy eritreritra isan-karazany tonga ao an-tsaintsika, ary tsy tsapantsika fa maro amin’izy ireny no lainga izay efa nekentsika mora loatra ho fahamarinana.

Ry namako, ny fomba tsara indrindra handresena ny lainga eo amin’ny fiainanao dia ny fahamarinana ! Raha ny marina kokoa dia ny famelana an’Andriamanitra hameno ny eritreritrao amin’ny fahamarinany.

Rehefa manomboka mieritreritra tsy an-kijanona momba ny fahamarinan’ny maha-ianao anao ianao, ny lanjanao eo imason’Andriamanitra, ary ny fikasany ho anao… Dia hiova tanteraka ny fiainanao !

Afaka manolo ny lainga amin’ny fahamarinana avy amin’Andriamanitra ianao, ary tehirizo lalandava ao an-tsainao izany. Tena mampitony sy mamelombelona !

Tena dingana lehibe amin’ny fanadiovana ny fanahintsika izany. Ary toy ny amin’ny dingana rehetra, dia mila fotoana kely ny mianatra miaina tanteraka indray amin’ity zava-misy vaovao ity. Izany indrindra no antony hanomezako anao ireto torohevitra izay mety tena ilaina ireto :

• Soraty : Mamporisika anao aho hanoratra izay rehetra tsapanao. Aza atao haingana loatra izany : soraty ny eritreritra ratsy rehetra izay nisy fiantraikany taminao nandritra ny taona maro, ny fahasarotana, ny tahotra, ny  fitaintainana, sns. Te hanafaka anao ny Tompo.
• Farito : Soraty ny lisitr’ireo sehatra rehetra izay ahitanao lainga eo amin’ny fiainanao. Avy eo, soraty ny fahamarinan’Andriamanitra mifanitsy amin’ireo lainga ireo. Mba hahitana ireo fampanantenana ireo ao amin’ny Baiboly, dia azonao atao ny mampiasa milina fikarohana ara-baiboly ary ampiasao ny teny manan-daja mba hahitana ny andininy rehetra mifandray amin’izy ireo.
• Tsarovy : Indrindra fa eo am-piandohana, makà fotoana itadidiana ny fahamarinana omen’Andriamanitra anao amin’ny teboka tsirairay, mandra-pahatafiditra tsara azy ao an-tsainao. Azonao atao ny mametraka fampahatsiahivana ao amin’ny findainao, na taratasy apetaka, ny solosainao misy andinin-teny ao amin’ny Baiboly, na izay mety hanampy anao hitadidy ireo fahamarinan’Andriamanitra mandritra ny tontolo andronao…
• Tandremo tsara ny eritreritrao : Hiezaka hiverina tsindraindray ireo eritreritra ireo, hisoko mangina tsy ho henonao, mba hanome endrika ratsy ny tenanao. Aza manaiky azy ireo ianao ! Tsy ianao ilay olona lazain’ny fahavalo sy ny hafa… Fa ianao dia ilay lazain’Andriamanitra momba anao !

Ry namako, Andriamanitra dia te hanafaka anao amin’ny fahamarinany !