🙌 Efa nitahy anao Andriamanitra!

Eo amin’ny samy kristiana dia matetika ny zanak’Andriamanitra no miteny hoe: “Hitahy anareo anie Andriamanitra”, ary azoko antoka fa efa nandre izany imbetsaka ianao!
Rehefa mampiasa an’io fitenenana io isika, dia milaza amin’ilay olona iray hoe: “Maniry aho mba homen’Andriamanitra anao ny zava-tsoa rehetra, mba hiaro anao Izy, mba hitari-dalana anao Izy, hanome anao fiadanana ary hampitombo ny zavatra vitanao eo amin’ny lafim-piainanao rehetra Izy”. Tena mahafinaritra loatra izany e? Ao ambadiky ny teny hoe “fitahiana”, dia izany rehetra izany no irariana ho an’ny hafa, na dia tsy voalaza mazava aza. Ary raha ny tena marina dia mihoatra lavitra noho izany aza.
Te hitahy anao Andriamanitra. Ankoatr’izay, efa vonona ny fitahiany, voaomana ho amin’ny fiainanao. Izany no lazain’ny Baiboly: “Isaorana anie Andriamanitra, Rain’i Jesosy Kristy Tompontsika, Izay nitahy antsika tao amin’i Kristy amin’ny fitahiam-panahy rehetra any an-danitra.” ( Efesiana 1:3 ). Efa notahin’i Jesosy Kristy ianao! Mandrotsaka fitahiana isan-karazany eo amin’ny fiainanao avy any an-danitra isan’andro Izy, na ara-batana na ara-panahy, ary tiany ianao mba ho afaka handray izany sy handeha amin’izany.
Ry namako, tsy mila miandry ny fitahiana: efa miandry anao ny fitahiana! Fotoana izao hanaovanao dingana feno finoana mba handraisanao azy ireo. Mandritra ity herinandro ity dia hijery ireo fanalahidy samihafa izay hanampy anao hahatsapa ny fitahian’Andriamanitra lalina kokoa sy mazava kokoa eo amin’ny fiainanao. Vonona ve ianao) ?
Mivavaha miaraka amiko hoe: “Tompo ô, misaotra Anao noho ny fitiavanao ahy sy ireo fitahiana isan-karazany homanonao ho ahy any an-danitra, izay efa vonona hirotsaka eo amin’ny fiainako. Ampio aho handeha ho Anao ary ny fiainako dia mba hanome voninahitra Anao amin’izay rehetra ataoko. Hirotsaka amiko anie ny fitahianao, tsy hisy ho sakana. Hankalazaina amin’ny fiainako anie ny Anaranao, ry Andriamanitro ô! Amin’ny anaran’i Jesosy, amena.”