🙌🏻 Mamaly ny antsonao foana Jesosy!

Manatona tsikelikely amin’ny faran’ity tantara mahafinaritra ity isika ary maro ny zavatra efa nohalalinintsika izay.

Omaly, hitantsika fa niova ny fifantohan’i Petera, izay lasa tamin’ny tafio-drivotra fa tsy tamin’i Jesosy, ka nahatonga azy lasa raiki-tahotra ary nanomboka nampilentika azy tao anaty rano .

Hoy ny Baiboly hoe: “Dia nanatsotra ny tanany niaraka tamin’izay Jesosy ka nandray azy sady niteny taminy hoe: Ry kely finoana, nahoana no nisalasala ianao?” (Matio 14:31)

Tena mahaliana ny mahita fa tsy nilentika avy hatrany i Petera. Nanomboka nilentika tsikelikely izy rehefa lasa nihemotra ny finoany ary nitombo ny tahotra tao aminy. Vao nihena ny finoany, dia nihena tsikelikely koa ny fahafahany nandeha teny ambonin’ny rano.

Na izany aza anefa, raha vao niantso vonjy tamin’i Jesosy i Petera, dia naninjitra ny tanany avy hatrany i Jesosy ary nandray azy. Tsy navelany hilentika mandritra ny fotoana ela i Petera, fa namaly ny antsony aingana Jesosy.

Ry namako, Jesosy dia mamaly ny antsoantso avy ao am-ponao foana! Raha misy zavatra manahirana anao ary tsy hainao ny fomba hialana amin’izany, dia antsoy fotsiny Izy! Aza mitahiry izany ho anao irery. Toy ny ankizy kely, miantsoa ny Rainao mba hanampy anao!

Tsy hamela anao hilentika na ho very Izy, fa mila miantso sy manome fahafahana Azy ianao hamonjy anao. Tadidio ilay andininy mahafinaritra manao hoe: “Antsoy Aho, dia hovaliko ianao ka hampisehoako zavatra lehibe sy saro-pantarina izay tsy fantatrao.” (Jeremia 33:3)

Anio no fotoana tokony hifikiranao amin’Andriamanitra amin’ny finoana feno sy matanjaka ao am-ponao! Ilay antso marina avy aminao no fanalahidin’ny fandravana ny asan’ny haizina eo amin’ny fiainanao sy hiainanao ireo fahagagana mahatalanjon’Andriamanitra!

Efa tena niainako matetika izany, ary azoko antoka fa hiaina an’izany koa ianao manomboka izao.

Mifikira hatrany!