😢Aza mitomany intsony 😊

Ahoana ny hevitrao momba an’ilay ohabolana hoe : “Izay manantena, very fanantenana ?” Efa nisy fotoana niandry ela loatra ve ianao ka niafara tamin’ny fahakiviana ?

Raha izaho manokana, raha mbola azoko atao dia aleoko mamita mialoha ny zavatra tokony ataoko : raha mbola azoko atao anio dia aleoko tsy miandry ny ampitso ; ary raha mbola azoko atao izao dia izao dia aleoko tsy miandry rehefa avy eo =) Amin’ny maha olombelona antsika dia sarotra ho antsika ny manana faharetana.

Hoy ny fahasambarana faharoa : « Sambatra ny ory fa izy no ampifaliana ! » (Matio 5 :4) Andalan-teny mitovy amin’ilay dikan-teny tamin’ny nampiasaintsika omaly : « Endrey ny fifalianareo amin’ny fiandrasana an’i Jehovah » (Matio 5 :4)

Eny ry namako, mandalo toe-javatra sarotra izay mampitomany sy mampikorotana antsika tokoa isika indraindray fa ao amin’i Jesosy no ahazoantsika fampiononana. Eny tokoa, hitan’i Jesosy ny fahorianao, ny zavatra hiainanao, ny andavan’androm-piainan’ny Malagasy…. tsy misy miafina Aminy. Ary raha ao anatin’io toe-javatra lalovanao io ianao no manatona an’i Jesosy ary manapa-kevitra hiandry sy hatoky Azy dia hiova tanteraka ny zava-drehetra ! Ovain’i Jesosy ho fifaliana ny fahakivinao ary ho tsiky ny ranomasonao.

Io fanambarana izay hitantsika ao amin’ny fahasambarana faharoa io dia manova ny zava-drehetra. Mankahery anao aho anio mba hametraka Aminy ny alaelonao sy hiaina ny Fifaliany : « Tompo o, atolotro Anao anio ny ranomasoko, ny tebibetiko, ny alaeloko ary manapa-kevitra ny hanantena Anao aho. Ampio aho hisaintsaina ny Teninao. Te hifaly ao Aminao mandritry izao toe-javatra hiainako izao, satria fantatro fa manana ny vahaolana Ianao ary hasehonao ahy ny fomba hivoahako amin’izao. Ho Anao irery ny voninahitra ! Misaotra noho ny Fandresenao ! Misaotra tia ahy ! Amin’ny anaran’i Jesosy, ilay Anarana ambonin’ny Anarana rehetra. Amen ! »

Anio, mitsahara ianao ary miandrasa an’i Jesosy. Te hanao fahagagana eo amin’ny fiainanao Izy!