😎 Aza manaiky ho resin’ny ratsy…

Maniry amin’ny foko manontolo aho fa manampy anao hiaina misimisy ny fandresen’Andriamanitra eo amin’ny lafim-piainanao ity andiam-pampianarana ity. Aza adinoina fa : manoatra noho ny mpandresy ianao!😉

Ny fiainana dia feno karazana fanapahan-kevitra izay raisintsika isan’andro ary matetika dia tsy tsapantsika akory aza.

Ny Baiboly dia milaza amintsika hoe : “Aza mety ho resin’ny ratsy ianao, fa reseo amin’ny soa ny ratsy.” (Romana 12:21)

Eny tokoa, misy ady foana eo amin’ny fahazavana sy ny aizina, eo amin’ny tsara sy ny ratsy. Fa ny vaovao mahafaly dia Jesosy Kristy efa nandresy ny aizina! Noho izany dia afaka mandeha ao amin’ny Fandreseny foana isika.

Ny vaovao ratsy koa dia matetika na dia efa afaka mahazo izany fandresena izany aza isika dia avelantsika ny aizina hamitaka antsika amin’ny lainga. Voatarika indray isika amin’ny fahazaran-dratsy taloha, amin’ny fomba fisainana taloha ary dia voasakana eo.

Ahoana ny fomba hiainantsika isan’andro ny fandresena izay efa azon’i Kristy? Amin’ny fandraisantsika fanapahan-kevitra tsikelikely isan’andro.

Ny fanapahan-kevitra tsikelikely isan’andro tokoa no fanalahidy ho amin’ny fandresena na ny faharesena.

Ny fiainantsika dia tambatry ny karazam-potoana, ary ny fanontaniana fototra dia hoe : ahoana ny ataonao?

• Ahoana ohatra no ataonao raha votsitra avy eny an-tananao ny vera ary vaky mipasaka?
• Ahoana ny mety ataonao manoloana ny fahadisoan’ny mpiara-miasa iray, na manoloana ny fanehoan-kevitra ratsy na fanakianana ataon’ny olona noheverinao ho namanao?
• Ahoana ny ataonao raha misy namana manao sangy ratsy na mamaky eso momban’olon-kafa amin’ny tambajotra sosialy ianao?

Ohatra vitsy ireo fa inoako fa azonao ny tiako hihaviana : mila mivonona foana isika handray ny fanapahan-kevitra mendrika indrindra.

Ao amin’ireo fanapahan-kevitra tsirairay raisintsika ry namako dia misafidiana handresy ny ratsy amin’ny tsara. Efa natolotr’i Jesosy anao ny Fandreseny!