😉 Miavaka ianao !

Ny Baiboly dia isan’ireo harena lehibe nomen’Andriamanitra antsika nandritra ny taon-jato maro.
Fantatr’I Josia mpanjaka tsara izany. I Josia, zafikelin’I Manase sy zanak’I Amona, dia nahita ny fiovana niainan’ny raibeny sy ny faharavana tampoka nanjo ny rainy rehefa niziriziry tamin’ny fahazaran-dratsiny izy.
Nanana fanapahan-kevitra lehibe i Josia : naniry hanaraka an’Andriamanitra izy. Niasa fatratra izy mba hampanjavona ny sampy rehetra. Nampanarina ny tempolin’I Jerosalema izy. Tamin’izany indrindra no nisehoan’ny tsy nampoizina : hita indray ireo bokin’ny Lalàna izay very. Rehefa hita ireo bokin’ny Lalàna ireo, dia nanetry tena teo anatrehan’Andriamanitra I Josia ary nangataka izy mba hovakiana ho an’ny vahoaka izany. Nanomboka tamin’io fotoana io, dia nampody izay rehetra voasoratra tao amin’ny Lalàna izy, ka nitodika tamin’Andriamanitra ny olona rehetra. Milaza mihitsy aza ny Baiboly fa ny Paka nankalazain’i Josia no Paka niavaka indrindra teo amin’ny tantara !
Eny, milaza ihany koa ny Baiboly fa : « tsy nisy mpanjaka tahaka azy teo alohany, izay niverina ho amin’i Jehovah tamin’ny fony rehetra sy ny fanahiny rehetra sy ny heriny rehetra araka ny lalàn’i Mosesy rehetra; sady tsy nisy tahaka azy intsony niseho tao aoriany. » (2 Mpanjaka 23:25)
Ry namako, ny hetaheta an’Andriamanitra sy ny Teniny dia manomana anao handray ny fitahian’Andriamanitra. Mitady olona mitodika Aminy amin’ny fony manontolo Andriamanitra : izany mihitsy no nampiavaka an’i Josia mpanjaka… Ary izany koa no hampiavaka anao.
Mamelà ahy hivavaka ho anao : “Tompo o, mivavaka ho an’ity namako ity aho, ary mivavaka ho ahy ihany koa : areheto amin’ny afon’ny Fitiavanao izahay ! Aoka hitady anao tsy ankiato ny fonay. Ampiasao izahay mba ho fitahiana ho an’ny manodidina anay. Misaotra amin’ny zavatra rehetra ry Andriamanitro ! Amin’ny Anaran’I Jesosy. Amen !”