🔥 Afo mandevona !
Tianao ve Andriamanitra hampiasa anao? Isika rehetra dia manana faniriana hanompo Azy , kanefa isika matetika mahatsiaro tena tsy mendrika.
Tadidinao ve ilay andalana miresaka momba ilay roimemy nirehitra? Taorian’ny 40 taona tany an’efitra, dia niseho tamin’i Mosesy tamin’ny fomba mahagaga Andriamanitra ary nilaza taminy izay rehetra hataony mba hanafahana ny Zanak’Isiraely amin’ny fanandevozana.
Hoy Andriamanitra taminy: “Koa avia ankehitriny ianao hirahiko ho any amin’i Farao hitondra ny Zanak’Isiraely oloko hivoaka avy any Egypta. Fa hoy Mosesy tamin’Andriamanitra: Iza moa aho no hankany amin’i Farao sy hitondra ny Zanak’Isiraely hivoaka avy any Egypta? Ary hoy Izy : Homba anao tokoa Aho.” (Eksodosy 3:10-12).
Maro ny olona efa hitako tamin’ny fiainako mamerina tsy tapaka ny maha-tsinontsinona azy sy ny tsy fahaizany. Manontany tena izy ireo hoe ahoana no fomba hampiasan’Andriamanitra azy ireo. Mety ho endrika fanetren-tena izany, fa raha ny tena marina dia tsy izany.
Tsy afaka nanao fahagagana na nanafaka ny zanak’Israely irery i Mosesy! Saingy afaka nisafidy ny ho lasa fantsona iray izay anaovan’Andriamanitra fahagagana izy. Tsy nahafaly an’Andriamanitra ny fikirizany tamin’ny fahakelezany sy ny tsy fahaizany: Nampahatezitra an’Andriamanitra mihitsy izany. (Eksodosy 4:14).
Ry namako, aza mifantoka amin’ny fahakelezanao, fa amin’ny fahalehibiazan’Andriamanitra.
Afo mandevona ny Andriamanitsika. Tiany ny handrehitra anao amin’ny Fitiavany mba handeha sy ho fantsona mitondra fitahiana ianao, na aiza na aiza misy anao. MitsangĂ na amin’ny finoana anio! Atreho ny tahotrao sy ny fahalemenao, ary midira amin’ny anjara izay efa nomaniny ho anao!
Andriamanitra dia hanao zavatra miavaka amin’ny alalanao. Mino izany aho !
