🔆 Ankehitriny, misy dikany ny zava-drehetra !
Araka ny hitantsika omaly, ny fihetsik’i Jesosy voalohany dia ny niresaka tamin’i Marta tamim-pitiavana sy tambitamby.
Niaraka tamin’izay, dia niresaka aminy mazava Izy, ary hatramin’ny voalohany dia nazavainy azy ny fototry ny olana.
Izany no fiasan’Andriamanitra eo amin’ny fiainantsika ! Tsy mandositra ny fifandonana Izy, fa tonga mamaha ny olana amim-pitiavana sy amim-pahamarinana, mba hanafaka antsika.
Izany no iray amin’ireo fanehoana lehibe indrindra ny atao hoe fitiavana marina : rehefa mijery ny olana na izay mety ho fahadisoan’ny tsirairay isika, ka miresaka momba izany mazava tsara amin’ny fiahiana, fitiavana ary fahendrena.
Marina fa mety hitondra amin’ny toe-javatra manahirana izany indraindray, saingy amin’izany fotoana izany no ahatsapan’ireo manodidina antsika ho afaka sy hiainany ny fitahian’Andriamanitra amin’ireo lafiny ireo !
Nanambara zavatra maromaro tamin’i Marta i Jesosy tamin’ny alalan’ny fehezanteny tsotra iray :
- Ekena izy, ary ahitsy amin’ny fitiavana toy ny zanakavavy.
- Ny olana dia tsy ao amin’i Maria, fa ao amin’ny tenany.
- Ny ahiahiny sy ny enta-mavesany no tena nahatonga izao olana izao.
Ary mbola hoy Izy taminy : “nefa zavatra iray loha no ilaina…” (Lioka 10:42).
Asehon’i Jesosy eto ny tena zava-dehibe sy ilaina. Rahampitso dia ho hitantsika fa mitondra mankany amin’ny Fanatrehan’Andriamanitra izany.
Fa anio dia tiako ny handinihantsika ny hevitry ny hoe “ilaina”. Inona no tena ilaina aminao ?
Tsy isalasalana fa ilay “Marta izay miaina ao anatinao” dia hilaza fa misy zavatra maro ilaina, toy ny asa, vola, fahasalamana… ary marina tokoa fa zava-dehibe ireo zavatra rehetra ireo.
Saingy zavatra iray ihany no tena ilaina. Raha manana asa, vola, fahasalamana, trano… kanefa tsy manana fifandraisana velona amin’i Jesosy isika dia very. Tsy misy dikany ny zavatra rehetra raha tsy misy Azy !
Ry namako, ny fifandraisanao akaiky amin’Andriamanitra no fototry ny zavatra rehetra, izany no manome dikany ny zavatra rehetra. Rehefa Izy no zava-drehetra ho anao, maka toerana ho azy ny zavatra hafa rehetra.
