🔄 Velomy hatrany ny “radar”!
Tonga eo amin’ny faran’ity andian-dahatsoratra ity isika izay misy andininy fohy nefa mahery vaika. Ny andininy fahaenina amin’ity andiany ity dia izao : “Hevero tsara ny zavatra rehetra, ka tano mafy izay tsara.” (1 Tesaloniana 5:21).
Azoko antoka fa hainao tsara ny mamantatra avy hatrany ny feon’ireo olona akaiky anao. Ary rehefa miresaka amin’izy ireo amin’ny telefaonina ianao na somary ratsy aza ny fifandraisana, dia azonao fantarina mora foana hoe iza izany, amin’ny fandrenesanao ny feon’izy ireo na ny fomba fiteniny, sa tsy izany?
Kanefa raha misy olona nifankahalala aminao vao haingana ary miantso anao amin’ny finday io olona io, dia azo inoana fa mila milaza aminao ny momba azy izy mba hamantaranao azy.
Tena marina izany : mahafantatra tsara kokoa ireo olona izay mifandray amintsika matetika isika. Mifankahalala amin’izy ireo isika ary fantatsika hatramin’ny fomba fihetsiny aza.
Toy izany koa ny amin’Andriamanitra sy ny devoly. Ny fahavalo dia te hangalatra, hamono, handrava ary hitady hamafy korontana eo amin’ny fiainantsika. Miezaka mamitaka antsika amin’ny fomba maro izy, ka mody maka ny toeran’Andriamanitra, na manao izay hinoantsika fa mampifanatona antsika amin’ny fahamarinana izy.
Arakaraky ny hanokanantsika fotoana miaraka amin’Andriamanitra eo amin’ny Fanatrehany no ahafantarantsika Azy sy hahamora kokoa ny fahafantarantsika ny Feony sy hanavahana ny fahamarinana amin’ny lainga.
Izao no lazain’i Jesosy rehefa maneho ny tenany ho Mpiandry Tsara Izy : “ny ondry manaraka Azy, satria mahalala ny feony. Ary ny vahiny tsy harahiny, fa handosirany, satria tsy fantany ny feon’ny vahiny.”(Jaona 10:4-5).
Izany no antony maha zava-dehibe ny andalan-teny anio. Mila manana fahazarana mandinika ny zava-drehetra mitranga eo amin’ny fiainantsika isika, ny zavatra rehetra mandalo eo amin’ny masontsika, ny sofintsika, ny eritreritsika, ny fihetseham-pontsika… mba hahafahantsika mamantatra sy mitahiry izay tena avy amin’Andriamanitra.
Ry namako, velomy hatrany ny “radar”-nao ! Mifantoka hatrany amin’ny eritreritra rehetra, ny sary rehetra ary ny fahatsapana rehetra tonga ato an-tsaiko aho, araka ny noresahiko taminao omaly. Noho izany, afaka manakana mivantana izay lalana tsy avy amin’Andriamanitra aho. Avy eo, afaka nifantoka amin’izay tena avy Aminy aho ! =)
