📖 Rehefa mamaky ny Baiboly aminao Andriamanitra…

Hotantaraiko anao ny nanjo ahy taona maro lasa izay : nisy zavatra nanamarika ahy mafy.

Andro amin’ny 3 maraina tamin’izay, vao taitra aho rehefa avy nanonofy ratsy maro nisesy… mbola tohina mafy aho izany…

Feno hevitra ratsy ny saiko, natahotra mafy aho, nisy zavatra nanindry ahy mafy tao anatiko ka tsy tafahetsika tao am-pandriana aho, na manokatra maso aza tsy vitako.

Tamin’izany fotoana izany dia vao avy nandray an’i Jesosy aho, ary mbola tsy nanana ny fahendrena sy fahamatorana ilaina mba handresena ny asan’ny aizina aho.

Tao anatin’izany trangan-javatra izany, dia nisy teny vitsivitsy tonga tao an-tsaiko : “Harovanao amin’ny fiadanana tanteraka izay rehetra mibanjina Anao, satria matoky Anao izy.”

Henoko ato anatiko hoe andalan-teny ao anaty Baiboly izany, fa mbola tsy henoko mihitsy hatrizay (na mety tsy tadidiko).

Naveriko imbetsaka ireo teny ireo, naveriko foana mandrapahatonga an’ilay fahamarinana tafatoetra lalina tao am-poko. Nifototra tamin’ny hoe : “Mila mihevitra an’Andriamanitra aho, mila mijanona ao Aminy ny eritreritro !”

Dia izay tokoa no nataoko : nifantoka tamin’Andriamanitra aho ary tadidiko ho azy ireo rehetra efa nataony teo amin’ny fiainako nandritra ny volana maromaro.

Niala tsikelikely ny haizina sy ny fahavesarana rehetra, ary namela ny fiadanana nameno ny foko indray. Fotoana vitsy avy eo, vonona ny hatory am-pilaminana indray aho mandra-maraina.

Nony tonga ny maraina, niezaka namantatra aho raha tao anaty baiboly marina ireo teny ireo na tsia. Rehefa nikaroka minitra vitsy teo amin’ilay rindrambaiko biblika efa taloha be izay nananako tamin’izany aho, dia hitako tao amin’ny Isaia 26.3 .

Tsy nampoiziko mihitsy : tena andalan-teny tao anaty Baiboly ilay izy ! Namaky andinin-tsoratra masina tao anaty Baiboly ho ahy Andriamanitra omaly alina ! Waouh ! 😄🙌🏻

Ry namako, ataovy izay ifantohan’ny fisainanao ao amin’Andriamanitra ! Rehefa mijery ny aizina izay manodidina antsika isika, dia mora matahotra sy mitebiteby… fa tsy misy na dia iray aza amin’ireo fisainana ireo afaka hihazona antsika rehefa misafidy ny hibanjina an’i Jesosy isika !