💬 Mitondra fitahiana ny molotrao

Avy amin’ny teny latinina hoe “benedicĕre” sy “maledicĕre” ny teny hoe “mitahy” sy “manozona”, izay midika hoe “miteny zavatra tsara” na “miteny ratsy” momban’ olona na zavatra iray.
Isaky ny “miteny zavatra tsara” momban’ny olona iray ianao dia mitahy azy, ary isaky ny “manaratsy” olona iray ianao dia manozona azy! Waouh! Efa nieritreritra ve ianao fa ny fanakianana ataonao, ny fimonomononanao, ny fitarainanao, sns… mety ho ozona ho an’ny hafa?
Matetika isika no tsy mahatsapa ny herin’ny tenintsika. Izaho manokana dia efa niaina mivantana io hery manimba io, tamin’ny fotoana iray teo amin’ny fiainako… Nifanesisesy ny tsy fifankahazoana sy ny toe-javatra manokana nahatonga ny sasany tamin’ireo namako akaiky sy olona akaiky ahy indrindra nivadika tamiko. Sarotra be ny niaina tamin’izany toe-javatra izany, ny fahafantarana fa niresaka momba ahy tao an-damosiko izy ireo, ka nitsikera ahy foana, ary nilaza zavatra ratsy momba ahy!
Hisaorana ny Tompo, fa nanomboka niova ny toe-javatra, ary ireo tsy fifankahazoana rehetra ireo dia nivaha rehefa nandeha teny ny volana. Saingy izany rehetra izany dia iray amin’ireo ady mafy tsy maintsy niaretako tamin’ny resaka fifandraisana. Ary eny, ny fitsikerana, ny fanalam-baraka, ny fitarainana… no tena fitaovana nampiasain’ny fahavalo mba hitondra ozona sy fahafatesana.
Araky ny teny ao amin’ny Baiboly : “Ny mahafaty sy ny mahavelona samy hain’ny lela,koa izay manarana azy dia hihinana ny vokany.” (Ohabolana 18:21).
Ho loharanon’aina anie ny lelanao! Mivavaka aho mba hesorina amin’ny vavanao ny ozona rehetra, ary ny teny fitahiana sy fiainana ihany no hiboiboika avy amin’ny molotrao ho an’ny hafa.