💝 Firy ny fanomezana azonao tamin’Andriamanitra?

Omaly isika dia niresaka ireo fanomezana izay nataon’Andriamanitra ho antsika sy ny hoe tsy tonga saina loatra isika ny amin’ireo zavatra izay omeny antsika ireo.

Anisan’ny tena nitahy ahy tamin’ny diako niaraka tamin’ny Tompo ny fahafantarana ny zavatra efa notanterahiny teo amin’ny fiainako sy ireo zavatra nomeny ahy. Tena fanomezana sarobidy avy amin’Andriamanitra ho amin’ny fiainako izany ! 

Hitanao, nanazatra tena aho ny hanomboka ny vavaka tsy mikipy maso rehefa ao an-tranoko ao ary misaotra an’Andriamanitra ny amin’izay rehetra hitan’ny masoko.

Misy tantarany avokoa ireo zavatra rehetra ireo, ary nomen’Andriamanitra antsika izay nilaintsika mba hahazoantsika azy tamin’ny fotoana voafaritra.

Mandritra ireny fotoam-bavaka ireny dia manomboka misaotra an’Andriamanitra aho amin’ny zavatra rehetra,  hatramin’ny kely indrindra ka hatramin’ny lehibe indrindra, satria manambara ny fitiavan’Andriamanitra antsika daholo ireny.

Ary mbola fanombohany izany : mbola maro be ireo zavatra mbola afaka hisaorana Azy ! Ireo olona izay eo amin’ny fiainanao, ireo fahagagana izay nataony tamin’ny fotoana nilantsika izany indrindra, tamin’ireo antsipirihany tamin’ny fiainanao sy ireo fotoana manan-danja…. Tena mahatoky amin’ny zavatra rehetra Andriamanitra !

Nilaza ny mpanjaka Davida tao amin’ny salamo iray : “Nohamaroinao ny fahagaganao sy ny hevitrao izay nataonao ho anay, Jehovah Andriamanitra ô. Tsy misy azo ampitahaina aminao Raha tiako hambara sy holazaina ireny, dia, indro, maro loatra izy ka tsy tambo isaina” (Salamo 40.5)

Ry namako, maro loatra ireo fanomezan’Andriamanitra eo amin’ny fiainanao ary tsy ho voatanisantsika izany !

Anio aho dia te hanome fanamby kely anao : ezaho tadidiana daholo ireo fanomezana  nomen’Andriamanitra anao tato anatin’ny taona vitsivitsy dia soraty anaty lisitra =)

Mety ho lava be mihoatra noho ny noeritreretinao tany amboalohany izany lisitra izany, na angamba tsy mety tapitra mihitsy…. Aza manahy fa izany mihitsy : miasa loatra amin’ny fomba maro eo amin’ny fiainantsika Andriamanitra….!

Rehefa avy nankafy izany fotoana izany ianao, dia saintsaino ireto fanontaniana ireto : “Ahoana ny niainanao ilay fanoratana izany lisitra izany ? Dia inona ny zavatra tsapanao izao raha nahita ireo fahagagana maro avy tamin’Andriamanitra ianao ?