🐸 Inona avy no manodidina anao ?

Inona no fiantraikan’ny fanehoan-kevitry ny olona manodidina anao eo aminao?
Fantatrao ve ny tantara momba an’ireo sahona kely telo ? Nihazakazaka lavidavitra izy telo mba hijery izay ho tonga voalohany eny an-tampon’ilay tendrombohitra. Nisy sahona maromaro ihany koa nanaraka teny an-dalana mba hijery ny hazakazak’izy ireo. Tsy nisy nahatoky ireo sahona telo hahavita hatramin’ny farany anefa izy rehetra ka tsy nitsahatra nanao teny fanesoana sy fahakiviana azy telo. Nandeha ny hazakazaka, ary nanomboka sahirana teo amin’ny fiakarana ireto sahona telo. Ny iray tamin’ireo sahona dia niala an-daharana teny am-povoan’ny hazakazaka, reraka tanteraka. Minitra vitsy taty aoriana dia nijanona koa ilay sahona faharoa fa ilay fahatelo dia tsy nijanona intsony. Ary na dia teo aza ny fanakiviana sy ny fanesoana nataon’ireo mpijery dia tonga teny an-tampon’ny tendrombohitra ihany izy. Gaga ny rehetra nony nahafantatra fa marenina ilay sahona nandresy.
Eny ry namako, ny olona manodidina antsika dia afaka mitaona antsika amin’ny soa na amin’ny ratsy, fa ny hany hampandroso antsika dia ny fananantsika finoana mijoro tsara. Izany no niainan’ilay jamba rehefa nandre izy fa mandalo Jesosy. Niantsoantso an’i Jesosy izy sady nihiaka mafy araka ny Baiboly. « Ary izay nandeha teny aloha dia niteny mafy azy mba hangina, fa vao mainka niantsoantso izy ka nanao hoe: Ry Zanak’i Davida ô, mamindrà fo amiko. » (Lioka 18 :39)
Izany fanapaha-keviny izany no nitarika azy tsy hiraharaha izay nolazain’ny olona ary namela azy hihaona tamin’i Jesosy, izay nanova ny fiainany ho mandrakizay. Ireo tabataban’ ny maro no nanokatra ny varavarana ho an’ny fahagagan’Andriamanitra !
Andao hiara-hivavaka isika: « Tompo o, mivavaka izahay mba hanomezanao anay ilay fahavononana azo avy amin’ny finoana. Ampio izahay hifikitra aminao ary hangataka amin’ny fahatokiana feno fa hiaina fahagagana izay hanova ny fiainanay ho mandrakizay izahay. Misaotra ny amin’izay ataonao eo amin’ny fiainanay ! Amin’ny anaran’i Jesosy. Amen ! »